Ministri i Mbrojtjes, Niko Peleshi, ka dhënë detajet e fundit mbi gjendjen aktuale të vatrave të zjarrin të vend. Përmes një postimi në Facebook, ai shkruan se në disa vatra situata është nënkontroll dhe tashmë janë drejt shuarjes. Peleshi bënë me dije se vazhdon të jetë problematike situata në Lezhë dhe pjesa më e madhe e forcave është përqendruar në këtë zonë. Gjithashtu në Lushnjë po punohet për shuarjen e flakëve të cilat në orët e pasdites morën përmasa të mëdha.
“Të dhënat më të fundit nga terreni flasin për një normalizim të situatës së zjarreve në 10 vatra problematike të zhvilluara gjatë 24 orëve të fundit. Janë nën kontroll dhe drejt shuarjes dy vatrat në Qarkun e Vlorës. Në qarkun e Durrësit janë neutralizuar 4 vatra zjarri, duke shmangur rreziqet për zonat e banuara.
Më e qetë është situata edhe në një vatër në fshatin Patin në Klos, si dhe në Vorë në fshatin Marikaj. Me një punë të përqendruar prej 2 ditësh të forcave zjarrfikëse, efektivëve të FA e punonjësve të emergjencave civile u arrit të izolohej zjarri në Orosh të Mirditës. Vëmendja është përqendruar në shpatin e malit në Balldren, në fshatin Lekbibaj në Tropojë si dhe në fshatin Dushk në bashkinë e Lushnjës”, shkruan ai.
Kujtojmë se që nga mbrëmja e shkuar flakë të mëdha kanë përfshirë Lezhën, duke vënë ën rrezik disa banorë, ndërsa kanë shpërthyer dhe disa municione, çka e përkeqësuan dhe më shumë situatën.
