Në fund të ndeshjes Flamurtari – Kukësi, në stadiumin e Vlorës është rregjistruar edhe një ngjarje shumë e rëndë. Një tifoz është rrëzuar nga shkallët dhe ka gjetur vdekjen. Ende pa u kryer ekspertiza mjeko-ligjore, u nxitua të thuhet se tifozi i ndjerë, i ardhur nga Orikumi për të ndjekur takimin ka pësuar infrakt, por nga dëshmitarë në ngjarje bëhet e ditur se është shtyrë nga një polic. Nëse një gjë e tillë vërtetohet, ky do të jetë edhe fundi i dhimbshëm i një historie paaftësie dhe brutaliteti, që shihet shpesh në stadiumet tona dhe ka për protagonist uniformat blu. Mjafton të kujtoni ndeshjet derbi midis Partizanit dhe Tiranës, apo midis këtyre dy skuadrave dhe Skënderbeut, për t’u bindur se sa pak janë në gjendje të bëjnë njerëzit me uniformë. Kush nuk e mban mend atë “show” në prag të derbit të fundit, kur u bllokuan pothuajse të gjitha rrugët e kryeqytetit për hir të masave të sigurisë dhe më pas ndeshja u ndërpre 10 herë, pasi tifozët kishin futur në stadium gjithçka që mendonin se mund ta përdornin për ta hedhur në fushë.
Dhe për të mbuluar këtë paaftësi model sheh herë herë pamje të tmerrshme dhune, kur turma policësh lëshohen midis njerëzve, aq sa të krijohet përshtypja sikur jeton në një vend të dalë nga një grusht shteti. Flamurtari – Kukësi ishte një ndeshje aq e qetë sa për t’u marrë shembull, por dikush humbi jetën. Shikoni këto pamje, janë marrë pak përpara fillimit të ndeshjes Burreli – Korabi në këtë javë (20-ta) të kategorisë së parë. Një shfaqe pa sens në stadiumin “Liri Ballabani” dhe në rrugët e qytetit. Ndërsa reagimi i matjanëve ishte i menjëhershëm pas këtij shtetrrethimi të frikshëm, për hir të një ndeshje futbolli, ku për 90 minuta nuk ndodhi absolutisht asgjë.
