Zjarri në komisariatin nr 5 në Kamëz ku humbi jetën i arrestuari Arben Mici 26- vjeç, mund të ishte parandaluar. Kështu shprehet eksperti i sigurisë Fatjon Softa, i cili ndër të tjera ka hedhur dyshime se policët nuk dinë të përdorin mjetet e shërbimit zjarrfikës.
Softa e konsideron të paprecedentë këtë ngjarje ku humbi jetën i riu dhe u plagosën dy të tjerë, ku ndër të cilët ka përmendur papërgjegjshmërinë e personave që bëjnë këtë detyrë, si dhe mungesa e sistemeve të sigurisë.
“Është një situatë e paprecedentë sepse ka ardhur nga disa faktorë. Faktori i parë është papërgjegjshmëria e personave të cilët e kanë dhe e kryejnë këtë detyrë, e dyta është mungesa e sistemeve të vëzhgimit të cilët janë për të parandaluar ngjarje të tilla, e dyta është për të evidentuar dhe e treta është për t’I arsyetuar, që në rastet kur ka problem ato të shërbejnë si element, për të pasur një anshmëri në gjykim, qoftë për forcat e policisë, qoftë dhe për ngjarjet që mund të ndodhin. Është mungesa e sistemeve të mbrojtjes dhe sistemeve të sigurisë. Sistemet e mbrojtjes kam parasysh sistemin e mbrojtjes nga zjarri. Janë sensorët, e dyta është monitorimi që duhet të kishte ndërhyrje dhe e treta është rasti i mungesës së profesionalizmit që nuk dinë të përdorin mjetet e shërbimit zjarrfikësit. Kjo është e pafalshme”, shprehet Softa.
Ai thotë se në lidhje me këtë ngjarje të rëndë, duhet të kishte patjetër dorëheqje e më pas të vazhdonin hetimet.
