Komisioneri për Zgjerimin e Bashkimit Evropian, Oliver Varhelyi ka zhvilluar një bisedë me kryedemokratin Lulzim Basha lidhur me afatet e Reformës Zgjedhore.
Përmes një postimi në twitter, Varhelyi thotë se përfundimi i saj në afatin e përcaktuat është thelbësore për Shqipërinë dhe rrugën e saj drejt BE.
“Fola sot me Lulzim Bashën duke mirëpritur fillimin e punës ndërpartiake për Reformën Zgjedhore në Këshillin Politik. Thelbësore për Shqipërinë dhe rrugën e saj drejt BE është që kjo reformë të përmbyllet pa vonesë të mëtejshme, në një linjë më marrëveshjen e arritur në Mars”, shkruan Varhelyi.
Në reagimin e tij, Basha thotë se e ka falenderuar Varhelyi për mbështetjen për Reformën Zgjedhore duke shprehur edhe vullneti për mbylljen e saj për të siguruar zgjedhje të lira dhe të ndershme.
“Bisedë shumë e frytshme me Komisionerin për Zgjerimin, OliverVarhelyi. E falënderova për mbështetjen e tij dhe theksova përpjekjet e Partisë Demokratike për të kontribuar për reformën zgjedhore. Nënvizova se vullneti politik është vendimtar si për ta përfunduar reformën, edhe për të garantuar zgjedhje demokratike, të lira nga shitblerja e votës dhe nga ndikimi i krimit të organizuar”, shkruan Basha.
