shkruan Fahri Xharra
“O, si nuk kam një grusht të fortë
T’i bij m’u në zemër malit që s’bezanë.
T’a dij dhe ai se ç’domethanë i dobët,
N’agoni të përdihet si vigan i vramë.”
E di, këtë e thoshte Migjeni në kohën e Zogut, këtë donin ta thoshin e gjithë Shqipëria, por nuk guxonin si i kërcënonte vdekja, këtë duan t`iu thonë edhe juve, por nuk kanë guxim, sepse nuk i dihet.
Por ja që po ta them që e gjithë Shqipëria është për të hyrë në Europë, por ti me milionerët dhe miliarderët e Shqipërisë e pengoni hyrjen.
Sikur Europa mos të na donte si shqiptarë, ato nuk do t’i pranonin mbi një milion shqiptarë. Po, po një milion shqiptarë të po kësaj Shqipërie. E shihni që Europa nuk është kundër shqiptarëve, por kundër jush! Ju jeni të vetëdijshëm për këtë, por nuk e doni fatin e Sanaderit të Kroacisë.
Ti po krijon “Mini-Shengen”, e me kë? Me Serbinë dhe Maqedoninë që janë “hasmit” më të mëdhenj të shqiptarëve. Pse Bullgaria, Rumania, Greqia e as Mali i Zi nuk iu bashkëngjitet? Sepse, ata e dinë qëllimin e fundit të kësaj “aleance”.
Ti nuk e lejon Shqipërinë të futet në Europë, sepse duhesh t`i dalësh krah Kosovës, e këtë nuk ta do zemra, por nuk ta lejon as Serbia.
Asnjë shqiptar nuk e do fjalorin tënd ndaj Europës, sepse Europa me amerikanët e çliruan Kosovën dhe e mbrojtën Shqipërinë nga shkapërderdhja.
“Gjithsesi, shefi i qeverisë – shkruan shtypi servil i Shqipërisë – theksoi se kjo nuk duhet ta nënshtrojë Shqipërinë, përkundrazi siç shtoi ai, duhet t’i dimë më shumë vlerat tona pa iu lutur Brukselit, pse jo të jemi ne që i themi “vafsh në djall!”.
Këtë mund ta thuash ti, por jo në emrin tonë !
Mali hesht, dhe në heshtje qesh.
E unë vuej, dhe në vuejtje vdes.
Po unë, kur? Heu! Kur kam për t’u qesh?
Apo ndoshta duhet ma parë të vdes?
O, si nuk kam një grusht të fuqishëm!
Malit, që hesht, mu në zemër me ia njesh!
I dëshpëruar Fahri Xharra nga Gjakova
15.07.21
