Fatjon Dule, 30 vjeç, Perikli Naçi, 23 vjeç dhe Vaso Mëkshi, 44 vjeç, të tre banues në Sarandë, janë vënë sot në pranga.
Të rinjtë janë kapur me droge dhe një sasi të konsiderueshme parash në makinë. Polici jep detaje se gjatë kontrollit në hyrje të qytetit të Tepelenës, është ndaluar automjeti që drejtohej nga Vaso Mëkshi dhe pasagjerë Fatjon Dule dhe Perikli Naçi, në të cilin, gjatë kontrollit, u gjetën një sasi lënde e dyshuar narkotike cannabis sativa, një armë e ftohtë (thikë), 8390 euro dhe 8 aparate celulare.
Policia ndër të tjera, sqaron përmes njoftimit zyrtar se gjatë kontrollit fizik të ushtruar të Perikli Naçi, u gjet një sasi tjetër lënde e dyshuar narkotike cannabis sativa, ndërsa gjatë kontrollit fizik të ushtruar ndaj Fatjon Dule, u gjetën 2140 euro.
Gjithashtu, nga kontrolli i ushtruar në banesën e shtetasit Vaso Mëkshi u gjetën 7990 euro.
Në cilësinë e provës materiale u sekuestruan në total 18 520 euro, arma e ftohtë, lënda narkotike, 8 aparate celulare dhe automjeti.
Materialet në ngarkim të shtetasve të mësipërm i kaluan Prokurorisë pranë Gjykatës së Shkallës së Parë Gjirokastër, për veprime të mëtejshme.
