Kryetari i Komisionit të Ligjeve, Ulsi Manja është shprehur se ngjarja në Rinas është e rëndë, është kriminale, por sipas tij, nuk është cënuar Siguria Kombëtare.
I ftuar në rubrikën “Opinion” në “News 24, Manja tha se Siguria Kombëtare cënohet kur cënohet rëndë Kushtetuta dhe popullata dhe situata del jashtë kontrollit.
“Grabitja është e rëndë si ngjarje. Kjo nuk vihet në diskutim. Ngjarja është kriminale, kemi të bëjmë me kriminelë të rëndomtë. Cenim i Sigurisë Kombëtare do të thotë kur kemi cenim të rëndë të Kushtetutës, kur preket popullata, kur situata del tërësisht jashtë kontrollit. Por në këtë rast nuk është situatë e tillë.
Ngjarja të hetohet në mënyrë shembullore. Të bëhen hetime për të gjitha bankat, kompanitë e transportit, kompanitë koncesionare dhe çdokush që ka qenë aktor. Prokuroria të hetojë të gjithë përgjegjësit, përtej grabitësve. Hetimet të thonë fjalën e vet. Inkurajoj policinë dhe prokurorinë që të çojnë deri në fund hetimet, duke zbardhur zinxhirin e përgjegjësisë penale. Është e rëndësishme që të punohet për kthimin e parave”, tha Manja.
