Nga Dritan Sejko
Unë si shumica e shqiptarëve të Çamërisë kam krijuar “imunitet” kundrejt sharjeve, ofendimeve e goditjeve poshtë brezit, ndër dekada.
Qysh kur isha fëmijë kam dëgjuar lloj-lloj etiketimi, epiteti, fyerje apo kërcënimi që i bëheshin një komuniteti. Në fillim nuk e kuptoja arsyen, por me kalimin e viteve nisa të kuptoj fare mirë dhe bashkë me arsyen u konsolidua dhe imuniteti karshi të gjitha shpifjeve. Bashkë me arsyen, imunitetin, m’u konsolidua ideja që duhet të isha më i zoti në atë që bëja për të forcuar imunitetin e krijuar që nga fëmijëria.
Sot, po jetojmë një valë të re të shpifjeve ndaj, jo vetëm individëve me origjinë nga Çamëria, por edhe karshi institucioneve të krijuara nga ky grupim shoqëror si PDIU dhe Shoqata Patriotike “Çamëria”.
Kjo valë e re e shpifjeve e ka arsyen, është po e njëjta: për të mbajtur në pushtet regjimin autoritar sot dhe regjimin totalitar dje.
Për këtë arsye nuk na bën përshtypje vala e re e shpifjeve. Por, gjëja që më vjen keq është se nga vala indoktrinimit të “Komitetit Qendror”, janë infektuar me ose pa dashje një pjesë e shqiptarëve të Çamërisë dhe jo vetëm. E pikërisht këtyre u bej thirrje që në qoftë se nuk keni mundësi të jepni krontribut sado të vogël personal në Çështjen Çame, të paktën heshtni e mos hidhni baltë mbi të, sepse më së shumti kjo baltë bie mbi vetë ju.
Si përfundim, dua të them se pavarësisht të gjitha këtyre çfarë thashë me lart, ky pushtet është në agoninë e fundit dhe shpresa për të tërë shqiptarët do të ringjallet edhe më e fortë.
