Kryeministri Edi Rama në fjalën e tij në prezantimin që i bëri garës ndërkombëtare për tunelin e Llogarasë, deklaroi se projekti do të materializohet shumë shpejt dhe do të financohet nga buxheti i shtetit.
Rama u shpreh se do të ketë një garë ndërkombëtare me kompani të cilat do të kenë eksperiencë në këtë fushë.
“Jemi në fillim të kurorëzimit të procesit për mbajtjen e këtij zotimi. Një zonë ku interesi është i gjithanshëm sepse nuk bëhet fjalë vetëm për një natyrë dhe klimë të mrekullueshme, por bëhet fjalë edhe për një zonë me histori dhe trashëgimi. Jemi gati të materializojmë këtë projekt që do të krijojë një akses krejt tjetër drejt zonës dhe do të shërbejë si katalizator shumë i fuqishëm në të gjithë rivierën Joniane. Janë bërë të gjitha analizat është bërë një punë mbresëlënëse nga ministrja dhe stafi për të matur të gjithë parametrat. Janë eksploruar dhe rrugët e mundshme të realizimit të projektit me investime të huaja apo partneritet publik privat dhe është rënë në konkluzionin që ky projekt të udhëhiqet dhe të financohet nga buxheti i shtetit. Projekti do të detajohet nga një proces i hapur dhe ndërkombëtar, do të përzgjidhet një kompani e huaj e cila do të ketë eksperiencë në këtë fushë,” u shpreh Rama.
