Donald Trump ka pranuar faktin se Rusia mund të ketë ndërhyrë në zgjedhjet e Shteteve të Bashkuara të Amerikës ku ai u votua si president.
Gjatë një konference për shtyp me presidentin polak Andrzej Duda, Trump deklaroi se mendon që Rusia dhe vende të tjera mund të kenë ndërhyrë në zgjedhjet e nëntorit.
“Mund të ketë qenë Rusia, por mendoj që mund të jenë përfshirë edhe vende të tjera, pra edhe pse nuk dua të jem specifik, kam përshtypjen se ka pasur ndërhyrje. Ka ndodhur për një kohë të gjatë, prej shumë vitesh”, është shprehur Trump.
Ndërhyrja e mundshme e Rusisë në zgjedhje po hetohet nga amerikanët, megjithatë Kremlini ka mohuar fuqimisht çdo akuzë.
