Ish deputeti i Partisë Demokratike, Tritan Shehu është shprehur se Edi Rama pasi përdori krimin për pushtet, tani po përdor Kosovën për të kërcënuar Europën.
Në një postim në Facebook, Shehu shkruan se “teza e loja “nacionaliste” e gjoja bashkimit të Shqipërisë me Kosovën është në dëm të perspektivës europiane të Shqipërisë, Kosovës, të Rajonit e të stabilitetit të tij”.
Ja postimi i tij i plotë:
Edi Rama po i bën një dëm të madh Kosovës, dialogut të saj me Serbinë dhe njohjeve ndërkombëtare me kërcënimet për Bashkimin me Shqipërinë, ose siç e quajnë jo miqt tanë për “Shqipërinë e Madhe”.
Pasi përdori krimin për pushtet tani Edi Rama po përdor Kosovën për të kërcënuar Europën vetëm e vetëm për të mbrojtur pushtetin e tij. Nëse do të donte vërtet Kosovën Edi Rama nuk do të mbështeste ndarjen e saj, nuk do tu vendoste traun kosovarëve e shqiptarëve, Shqipëria nuk do të ishte vendi i dytë pas Serbisë me tarifat më të larta për Kosovën, dhe nuk do bëhej një shkak me shumë për pengimin e liberalizimit të vizave ndaj Prishtinës, Përdorimi i Kosovës për interesa përsonale është kriminale. Teza e loja “nacionaliste” e gjoja bashkimit të Shqipërisë me Kosovën është në dëm të perspektivës europiane të Shqipërisë, Kosovës, të Rajonit e të stabilitetit të tij.
Kjo demagogji shkon ndesh me interesat tona kombëtare të bashkimit real të të gjithë shqiptarëve nesër, si vende pa kufijë në BE.
