Dy nxënës të një shkolle 9-vjeçare në Tiranë janë arrestuar pasi janë kapur me një sasi prej afro gjysmë kilogrami marijuanë.
Lënda narkotike mbahej në ambientet e shkollës “Avni Rustemi” në rrugën e Durrësit nga nxënës të klasës së nëntë, M.B., 15 vjeç, dhe F.H., 16 vjeç. Shërbimet e Komisariatit nr.3 bënë të mundur arrestimin e të miturve pasi u lajmëruan nga drejtoresha e shkollës, e cila ishte vënë në dijeni nga mësuesja tyre.
Nga hetimet policia zbuloi se nxënësit kishin 3 ditë që lëviznin me drogë me vete, me qëllim që ta shisnin në doza të vogla tek nxënësit e tjerë. Ndërkohë është shpallur në kërkim një shtetas nga Burreli, i cili sipas të miturve është një i afërm i cili u ka siguruar lëndën narkotike.
