Një 55-vjeçar është vënë në pranga nga policia pasi gjatë kontrollit në makinën e tij i është gjetur një armë kallashnikov.
Oficerët e Komisariatit numër 6, pas informacioneve të marra në rrugë operative se një person qarkullonte me armë zjarri në makinë, menjëherë kanë organizuar punën për arrestimin e tij dhe bllokimin e armës së zjarrit.
Si rezultat i ndërhyrjes në kohë, në afërsi të “Mega Outlet”, shërbimet e Policisë kanë bllokuar automjetin tip “Ford”, që drejtohej nga Ramazan Tanushi. Nga kontrolli i ushtruar në bagazhin e mjetit është gjetur dhe sekuestruar një armë zjarri kallashnikov dhe një krehër.
Në përfundim të veprimeve të para u bë arrestimi në flagrancë i Ramazan Tanushi, 55 vjeç, banues në Tiranë.
