Një person është shpallur në kërkim nga Policia e Tiranës, pasi dyshohet se ka dhunuar drejtorin e Agjencisë Kombëtare të Ekonomisë së Mbetjeve (AKEM), institucion që funksionon në varësi të Ministrisë së Turizmit dhe Mjedisit.
Sipas burimeve policore, ngjarja ka ndodhur pas një konflikti që dyshohet të ketë lidhje me ndërprerjen e marrëdhënieve të punës së personit të shpallur në kërkim. Mësohet se ai ka pritur drejtuesin e AKEM pranë ambienteve të ministrisë, ku fillimisht mes tyre ka pasur një përplasje verbale.
Debati më pas ka degraduar në kanosje dhe dhunë fizike, ku i dyshuari pretendohet se e ka goditur me grusht zyrtarin. Pas denoncimit të ngjarjes, strukturat e Policisë kanë nisur veprimet hetimore për dokumentimin e plotë të rastit.
Ndërkohë, vijon puna për identifikimin e vendndodhjes dhe arrestimin e personit të dyshuar, ndërsa hetimet pritet të zbardhin rrethanat e plota që çuan në incident.
