Mësuesi i shkollën 9-vjeçare në Kashar do të përballet sot në Gjykatë për akuzat se ka ngacmuar seksualisht një nxënëse 14-vjeçare.
Gjatë marrjes në pyetje nga trupi gjykues, mësuesi i matematikës Hasan Martani ka mohuar kategorikisht akuzat që rëndojnë ndaj tij si dhe konsideroi të paligjshëm arrestimin e tij. Ai pohoi se me vajzën ka pasur një raport korrekt mësues-nxënës.
Mësuesi i matematikes në shkollën 9-vjeçare në Kashar, Hasan Martani u arrestua dy ditë më parë me kërkesë të Prokurorisë së Tiranës. Martani dyshohet se ka abuzuar seksualisht me një nxënëse të klasës së shtatë në ambientet e shkollës.
Kallëzimi në polici është bërë nga prindërit e vajzës së abuzuar. Në prani të psikologut, vajza ka treguar se mësuesi i Matematikes që ishte dhe mësuesi kujdestar i saj e mbante në klasë dhe kryente veprime të turpshme me të. Ajo ka rrëfyer më tej, duke shtuar se mësuesi e puthte dhe e prekte në zona intime. Sipas saj veprimet bëheshin edhe në korridore apo ambiente të tjera të shkollës.
Nëna e adoleshentes më herët kishte mësuar nga Facebook se vajza e saj abuzohej nga mësuesi në ambientet e shkollës.
“Vajza ime e denoncoi. Nuk ka pasur shqetësim nga mësuesit e tjerë. Edhe për këtë mësues kam pasur respekt se ishte autoritar. Jam befasuar kur i pashë me sytë e mi mesazhet në ‘Facebook’. M’u shemb bota. Vajza është ekselente. Si ngjarje kam një javë që e di. Kam dorëzuar provat. Nuk duhet vetëm pezullimi, por kërkoj të dënohet. Ai që dyshonim se ishte i rrezikshëm iku. Kam qenë e shqetësuar se vajza si tip ka qenë edhe e mbyllur dhe mbyllja shkoi edhe më tej”, shprehet ajo.
