Në Shqipëri kemi dëgjuar për ndeshje të trukuara, madje për më shumë se një, në çdo javë të luajtur të kampionatit. Dhe pikërisht çdo javë jemi mes tifozësh, një pjesë e të cilëve nuk kanë asnjë limit për të nxjerrë nga goja çdo lloj ndyrësie. Por gjithsesi, urrejtja e tifozëve të Tiranës për ata të Partizanit dhe anasjelltas nuk njeh kufinj. Së fundi, një pjesë e mbështetësve të ekipit bardheblu i kanë kërkuar futbollistëve dhe drejtuesve të tyre t’i hapin portën Skënderbeut, për t’ia bërë të pamundur kështu Partizanit të shpallet kampion pas 24 vjetësh. Dhe nuk mund të quhet idiotësi tifozësh, jo vetëm për faktin që u bë objekt i faqeve të para në shtypin e përditshëm sportiv dhe temë debate në “Rubrikën Sportive”, por edhe sepse klubi nuk prononcohet zyrtarisht, duke e ruajtur si alibi këtë kërkesë të çmendur. Paradoksi është, që janë po këta tifozë, të cilët prej kohësh e kanë bojkotuar skuadrën me moton : “Jo dallavereve”. Veç të tjerave, me një humbje të mundëshme ndaj Skënderbeut, Tirana e tyre ka mundësi ta humbasë sërish rastin për një vend në Europa League. Pra kjo është një logjikë e pastër shqiptare: “Unë nuk dua gjë, por atyre merrja të gjitha”.
