Megjithëse janë përpjekur ta mbajnë larg vëmendjes së publikut, tashmë është e qartë gjendja e vështirë financiare e Tiranës. Klubi më i titulluar në vend ka trashëguar borxhe të vjetra, një pjesë e të cilave janë likujduar me shumë sforco, por fakt është që janë shtuar edhe të reja. Që nga punonjësit e stadiumit “Selman Stërmasi” dhe deri tek futbollistët e stafi, gjithsecili ka paga të prapambetura, madje prej disa muajsh. Këtu përfshihen edhe ata që janë larguar në fund të sezonit që sapo u mbyll dhe që sigurisht do t’i drejtohen UEFA-s për zgjidhjen e këtij konflikti. Dhe fundi i këtij lloj gjyqi gjithmonë dihet; humbasin borxhlinjtë. Në këto kushte, klubi kërkon që Bashkia si bashkëpronare me 24 % të aksioneve të përmbushë detyrimet e saj vjetore, që flitet për rreth 300 milionë lekë të vjetra të llogaritura nga klubi. Por ka shumë mundësi që ankesat nëpërmjet mediave të mos vlerësohen nga kryebashkiaku Veliaj, madje në variantin më të keq mund të kthehet në bumerang. Bashkia e plotëson detyrimin e saj me stadiumin (tashmë i vetmi i kryeqytetit), ku është pronare e vetme, por që prej më shumë se një viti ia ka lënë klubit ta menaxhojë. Pra përfitimet nga çmimet e kripura të biletave i ka administruar vetëm Halili. Po ashtu edhe fushat sportive të kompleksit “Skënder Halili”, si dhe të gjitha asetet e tjera sportive nën pronësi të Bashkisë së Veliajt i kanë kaluar klubit në përdorim, pa asnjë detyrim. Ndërsa për para të thata… ndoshta tani duhet filluar për të parë në vend tjetër.
