Duket se zgjedhjet në Partinë Demokratike dhe rikonfirmimi i Bashës në krye të opozitës i zbehën pak pakënaqësitë ndaj tij, por votat e të djathtëve për Ruçin kanë risjellë kërkesën për dorëheqjen e kryedemokratit.
Ilir Kaduku, një nga themeluesit e Partisë Demokratike i thotë Bashës se nuk e ka njohur si kryetar të PD ndaj i kërkon të dorëhiqet dhe të lejojë demokracinë të marrë frymë lirisht.
Statusi i plotë i Kadukut
Holandez i dashur! Unë, Ilir Kaduku, themelues i PD, profesori i lëvizjes studentore ’90, individi që nuk ka gëzuar asnjë post politik dhe shtetëror në jetën e tij, personi që nuk njeh as edhe një njollë në biografinë e tij politike, publikisht të deklaroj: nuk të kam njohur dhe as nuk të njoh për lider opozite! Me sinqeritetin më të madh të kërkoj që të japësh dorëheqje sa më parë dhe të lejosh demokracinë shqiptare të marrë frymë lirisht! Populli Shqiptar nuk do të lejojë që ti dhe Shpura Basha të mohojnë sakrificat për çrrënjosjen e komunizmit dhe për instalimin e demokracisë reale! Lëri matrapazllëqet politike, mashtrimet patologjike, ndërgjegjësohu dhe largohu nga skena politike sa nuk është vonë! Vetëm revolucioni i vërtetë demokratik jashtë sistemit të fëlliqur politik që ka gatuar kuzhina elektronike Basha – Rama mund të shpetojë demokracinë shqiptare nga katastrofa! Poshtë 18 Maji, dita e tradhetisë kombëtare, e kurverimit politik PD – PS!
