Thellohet edhe më shumë skandali me përzgjedhjen e Edi Ramës, Valdrin Pjetrin, për kryetar të Bashkisë së Shkodrës.
Pjetri, edhe pse që nga viti 2003 ka qenë një i dënuar dhe i përzënë nga drejtësia italiane për trafik doge, është pajisur në mënyrë “të çuditshme” në detyrat e tij të larta shtetërore, me çertifikatë sigurie.
Sipas burimeve të sigurta të syri.net, Valdrin Pjetri, në periudhën që ka qenë drejtor në Ministrinë e Mbrojtjes është pajisur “fare lehtë” me çertifikatë sigurie nga ana institucioni përgjegjës, direkt në varësi të kryeministrit Rama.
Kështu mësohet se Drejtoria e Sigurimit të Informacionit të Klasifikuar (DSIK), e cila varet nga kryeministria, ka anash kaluar faktin e të kaluarës kriminale të Pjetrit dhe i ka dhënë atij një çertifikatë pastërtie, e cila i jepte të drejtën që të kishte akses, edhe në sekretet shtetërore në Ministrinë e Mbrojtjes, të cilat janë të ndërlidhura me ato të NATO-s.
Në vitet viti 2014-2015, Valdrin Pjetri, ka mbajtur detyrën e Drejtorit të Drejtorisë së Pronave në Ministrinë e Mbrojtjes dhe më pas në vitin 2015-2018 është “graduar” si Drejtor i Përgjithshëm i Shërbimeve Mbështetëse në Ministrinë e Mbrojtjes. Kjo drejtori e dytë është mjaft e rëndësishme, pasi operon edhe në shitje-blerjen e armëve dhe veçanërisht në fushën e ndihmës që merr ushtria shqiptare nga NATO; në armë, mjete dhe logjistikë.
Pikërisht në këtë pozicion të rëndësishëm dhe delikat, Pjetrit i është dashur çertifikata e sigurisë, e cila i është dhënë pa asnjë lloj filtri dhe përgjegjësie ligjore nga DISK, në varësi të kryeministrit Rama.
Po zbulohet që në rastin “Valdrin Pjetri”, kanë dështuar të gjitha institucionet përgjegjëse, duke nisur me KQZ-në dhe përfunduar te Ministria e Drejtësisë, të cilat duhet ta kishin kapur më herët se opozita këtë infiltrim të krimit në zyrat e larta të shtetit, por pajisja me çertifikatë sigurie e një individi me të kaluar kriminale ndërkohë që ka akses në sekretet e NATO, e thellon skandalin dhe e ndërkombëtarizon atë.
/syri.net/
