Një tërmet i fuqishëm goditi sot pak para mesditës Greqinë. Tërmeti me madhësi 6 i shkallës Rihter me epiqendër pranë Larisas, në jug të Elasonës dhe me thellësi 7.8 km.
Mediat greke raportojnë menjëherë pas lëkundjeve, banorët e Larisas dhe Elasonas kanë pushtuar rrugët dhe sheshet duke rendur të trembur.
“Ne po përpiqemi të kontrollojmë situatën. Të gjithë janë të tmerruar dhe të panikosur si rezultat, dolën jashtë shtëpive. Kishte shqetësim. Tërmeti jo vetëm që u ndje, por gjithashtu zgjati të paktën 15 sekonda. Të gjitha strukturat e bashkisë janë të gatshme të bëjnë të gjitha kontrollet në ndërtesa, për të parë nëse ekziston ndonjë rrezik. Deri më tani nuk kemi raporte për dëmtime,” tha Kryetari i Bashkisë Nikos Gatsas rreth situatës në zonën e Elassona.
Sa i përket magnitudës ka raportime të tjera siç është ajo e Qendrës Mesdhetare për Studimin e Tërmeteve që thekson se bëhej fjalë për një magnitudë 6.2 të shkallës Rihter, megjithatë janë autoritetet lokale ato që kanë përparësi në këtë rast pasi kanë matësit më pranë epiqendrës.
Lëkundjet e tërmetit ishin tepër të forta aq sa u ndjenë edhe në mjaft qytete të Shqipërisë, përfshi edhe Tiranën. Ato zgjatën për disa sekonda duke shkaktuar alarm tek banorët, ndërsa nuk dihet ende nëse kanë shkaktuar apo jo dëme në zonën përrëth epiqendrës.
