Lëkundjet sizmike që po prekin Shqipërinë janë bërë tashmë një rutinë e zakonshme. Prej dy ditësh, toka lëkundet ditë e natë, edhe pse magnitudat e këtyre të fundit kanë qenë më të ulëta.
Në një lidhje telefonike për Fax News, sizmiologu Rrapo Ormeni u shpreh se tërmetet mund të vazhdojnë, pasi një lëkundje si ajo e ditës së mërkurë shoqërohet me lëkundje të tjera.
“Është e natyrshme që kjo goditje të shoqërohet me çlirim goditjesh të tjera. Deri më tani janë regjistruar 516 goditje sizmike. Dendësia vjen duke u zvogëluar, por do të ketë dhe disa të tjera. Gjatë mesnatës është regjistruar një tërmet me magnitudë 4.3 ballë dhe është normale që të ketë goditje të këtij niveli, por nuk do të ketë goditje si ditën e parë, 4.2 ballë apo 4.3 janë pa efekte. Mund të zgjasin me ditë apo me javë, por ritmi dhe dëndësia vjen duke u zvogëluar.”
Ormeni shtoi se tërmeti i dy ditëve më parë nuk ka qenë ndër më të fuqishmit, pasi sipas tij para një muaj në Vërnik të rrethit të Vlorës është ndjerë një tërmet me magnitudë 5.1 ballë, por ka qenë në një zonë rurale.
Si duhet të veprojë një qyetar kur bie tërmet?
“Në momentin që bie tërmeti njerëzit duhet të presin që të mbrojë lëkundja, të mos lëvizin, të futesh poshtë një tavoline për t’u mbrojtur. Kur mbaron tërmeti duhet të heqësh ujin apo elektricitetin dhe të dalësh jashtë sepse mund të shoqërohet me goditje të tjera më të fuqishme.”
