Protestuesit e Kavajës janë përplasur me policinë përpara bashkisë së Kavajës.
Protestuesit e mbledhur përpara bashkisë kanë ndaluar që të hyjë në godinë kryetarin e ri të Bashkisë Redi Kraja, dhe prefekten e Tiranës Suzana Jahollari.
Brenda në godinën e Bashkisë ndodhet që prej mëngjesit Isa Sakja, i cili pretendon se nuk do ta lërë zyrën e tij.
Mbështetësit e PD-së thërrasin në kor emrin e ISA Sakjas, ndërkohë që prefektja Jahollari pretendon se ka në dorë dokumente ligjore, që urdhërojnë nxjerrjen jashtë të kryetarit demokrat të Kavajës.
“E mora në telefon zotin Sakja. Nuk përgjigjet. Ne nuk duam të përplasemi. Jemi në të drejtën ligjore. Unë kam detyrim ligjor që pas mbledhjes së parë të verifikojmë mandatet. Me këtë dokumentacion, janë edhe pesë vendime që u bë aktiviteti, kemi dëshirën më të madhe për të biseduar me kryetarin e bashkisë Sakja dhe për të bërë zëvendësimin e kryetarit të bashkisë.
Ky kryetar është në bazë të ligjit, në mos sot, apo nesër ai do të vazhdojë detyrën. Nuk është e rendësishme nëse do hyjë tani në zyrë. Do vazhdohen procedurat ligjore. Unë komunikova me kryetarin e bashkisë. Ai duhet të ishte në krye të detyrës. Ne thjesht do njoftimin zyrtarisht procedurën”, tha prefektja e Kavajës.
