Mijëra besimtarë myslimanë në mbarë botën festojnë sot Kurban Bajramin. Në orët e para të mëngjesit të sotëm , besimtarët shqiptarë kanë mbushur sheshet për të falur Kurban Bajramin.
Në Tiranë besimtarët iu drejtuan Zotit me lutje për më shumë paqe dhe harmoni në Sheshin ‘Skënderbej’.
Në mesazhin e tij para qytetarëve, kryetari i Komunitetit Mysliman të Shqipërisë, Bujar Spahiu u shpreh se simbolika e kësaj dite është kurbani, si shenjë mirënjohjeje ndaj Allahut.
“Allahut i intereson devotshmëria jonë. Te Allahu nuk arrin as mishi dhe as gjaku i Kurbanit, por bindja ndaj tij. Sot në këtë ditë besimi Bajrami. Dëshmia e sakrificës na bën që ti jemi Zotit mirënjohës.
Kjo na nxit të jemi gjithmonë të gatshëm dhe të bëjmë sakrifica për fe dhe atdhe. Kurbani do të thotë afrim të njeriut me krijuesin. Njerëzit nuk duhet t’i ndërpresin shpresat te Allahu”, tha ai ndër të tjera.
