Pa u shpërndarë ende tymi dhe pluhuri i prishjes së godinës së Teatrit Kombëtar, përfaqësues të SPAK, nxituan të deklarojnë se nuk është puna e tyre shembja e kësaj godine. Drejtuesi i SPAK ka deklaruar në media: “Hetimet që kemi nisur ne nuk kanë lidhje me shembjen e Teatrit. Janë procedura të tjera. Pra, hetimi ynë nuk ka lidhje me atë që ndodhi sot. Nuk është kompetenca jonë…”.
Po sipas njoftimeve zyrtare SPAK ka regjistruar kallëzimin penal të bërë nga Aleanca për Mbrojtjen e Teatrit për kryetarin e Bashkisë Erjon Veliaj. Aleanca depozitoi më 6 maj në Prokurorinë e Posaçme padinë ndaj Veliajt, duke e akuzuar këtë të fundit për “shpërdorim detyre, korrupsion i zyrtarëve që kryejnë funksion publik, kryer në bashkëpunim”.
Menjëherë pas nisjes së këtij hetimi drejtues të opozitës e quajtën test për SPAK për këtë hetim. Por siç edhe shihet nga deklarimi i Drejtuesit të SPAK-ut, testi duket se nuk funksionoi. Dhe për këtë duhet opozita të tregojë se sa teste të tjera duhet të presë. Gjithsesi, në atë çka SPAK ka deklaruar duhet të theksojmë se është apsolutisht e pavërtetë që këto hetime nuk kishin lidhje me godinën e Teatrit e për rrejdhoje dhe me shembjen e saj.
Së pari, pavarësisht nga kallëzimi që ishte dorëzuar në Prokurorinë e Posaçme, prokurorët kanë detyrimin ligjor që të shohin në kompleks çdo veprimtari antiligjore të subjekteve të kallëzuara. Për rjedhojë duke qënë se indiciet për një shpërdorim të detyrës nga zyrtarët e bashkisë ishin të forta, të qenësishme dhe tashmë të bëra publike. Kishte dyshime të bazuara se vendimmarrja e drejtuesve të bashkisë për prishjen e godinës së teatrit, mund të ishte marrë si rrjedhojë i një fallsifikimi intelektual të aktit të ekspertimit vlerësues të godinës, por dhe e vetë mbledhjes së Këshillit Bashkiak. Në këtë mënyrë të dhënat dhe indiciet krijonin dyshime të arsyeshme se vepra penale e shpërdorimit të detyrës mund të ishte konsumuar tërësisht dhe do të sillte pasoja të mëtejshme kjo veprimtari e paligjshme (siç edhe ndodhi). Jo moralisht, por procedurialisht SPAK si një strukturë që vepron mbi bazën e Kodit të Procedurës Penale nuk është e vërtetë se nuk ka lidhje me prishjen e godinës. Në këtë dyshim të fortë për paligjshmëri SPAK-u do duhej të vinte në lëvizje mekanizmin që parashikon neni 274 i Kodit të Procedurës Penale mbi sekuestrot preventive. Në këtë nen përcaktohet qartë: “Kur ka rrezik që disponimi i lirë i një sendi që lidhet me veprën penale mund të rëndojë ose të zgjasë pasojat e saj ose të lehtësojë kryerjen e veprave penale të tjera, me kërkesën e prokurorit, gjykata kompetente urdhëron sekuestrimin e tij me vendim të arsyetuar”.
Pra, e thënë më thjeshtë Prokuroria e Posaçme do duhej të sekuestronte në mënyrë preventive Objektin e Teatrit Kombëtar, derisa të sqaroheshin rrethanat e faktit penal, për të cilin po kjo prokurori kishte nisur hetimin. Dhe e gjitha kjo do të bëhej për të shmangur pasojat e një paligjshmërie (prishja e godinës).
Me pak fjalë, shpërdorimi i detyrës i supozuar nga drejtuesit e bashkisë me anë të kësaj sekuestroje nuk do sillte më pasoja.
Por, tashmë drejtuesit të SPAK i lindte detyrimi ligjor të hetonte dhe për Shkatërrim të Pronës me mjete të tjera parashikuar nga neni 154 i K.Penal: “Shkatërrimi apo dëmtimi me dashje i pronës me mjete të tjera, që përbëjnë rrezik për mjedisin rrethues dhe jetën e njerëzve, dënohet me gjobë ose me burgim gjer në pesë vjet”. Pasi ishte në hetim e sipër të një procedimi penal ku dyshohej se kishte veprime të paligjshme për shembjen e një godine. Dhe dukshëm shembja përbënte rrezik për artistët që gjendeshin në Objekt.
E gjitha kjo analizë të sjell ndërmend faktin që masat ishin marrë në çdo drejtim nga shembësit. Dhe SPAK-u i dalë plot fuqi nga Reforma në Drejtësi nuk do kishte mundësi t’i ndalonte.
Përtej testimeve të opozitës, SPAK-u qysh me krijimin e tij, përveç se administroi sukseset e hetimeve të ish-Prokurorisë për Krime të Rënda, kaloi dy teste: 1- Të mbështeste Ligjin e famshëm Anti-KCK, dhe 2- të ndalonte prishjen e Teatrit.
Testin e parë e kaloi plot sukses dhe tashmë zëdhënësja bjonde e anti-KÇK i hoqi syzet. Ndërsa testin e dytë SPAK-u nuk e kaloi me sukses, pasi vendosi syzet e errëta dhe nuk pa tymin e pluhurit që vinte nga godina e shembur e Teatrit.
