Kryeministri Edi Rama ka reaguar sërish ndaj akuzave të opozitës lidhur me udhëtimet me charter duke thënë se vetëm këtu ndodh që opozita të shpifë e të gënjejë dhe pastaj kërkon të bëhet transparencë.
Sipas tij, ajo që po kërkon opozita të bëjë çdo ditë është të helmojë shqiptarët me helm dhe shpifje, ndërsa i justifikon shifrat duke thënë se Shqipëria nuk ka mundësi të blejë avion privat, por blen orë fluturimi me marrëveshje.
“I Zot të qash a të qeshësh, vetëm këtu bën vaki të të dyndin me shpifje dhe të të thonë bëj transparencë! Po si bëhet kjo transparenca kur u tregon shifrat dhe bëjnë sikur nuk kuptojnë?! Po kur thonë pse i bën reklamë Shqipërisë? Po kujt t’i bëj, kanaleve, portaleve apo rublave?! Lëre pastaj kur thonë me charter udhëtojnë vetëm sheikët e diktatorët, ndërkohë që tërë qeveritë e rajonit, se Europës po e po, kanë avionët e tyre përjashto Shqipërinë e Kosovën! Ne s’e blejmë dot, me qira s’e marrim dot, ndaj kemi blerë orë fluturimi me marrëveshje promocionale! Po ku është hilja thonë se s’ka mundësi?! Ka si s’ka! Hilja është ashiqare fare tek përpjekja non stop për ta helmuar, çoroditur, nxitur për sherr e për konflikt këtë popull me shpifje sa më të përbindshme, nisur nga gjysmë të vërteta që janë edhe gënjeshtrat më të mëdha!”, shkruan Rama në Twitter.
Opozita kërkoi një ditë më parë ngritjen e një komisioni hetimor për udhëtimet e kryeministrit jashtë Shqipërisë, ku sipas tyre shuma e shpenzuar arrin në 22 milionë euro. Madje ish kryeministri Berisha kërkoi edhe dorëheqjen e Ramës, pasi sipas tij ka abuzuar me taksat e qytetarëve shqiptarë.
