Nga Enkel Demi
Partia Drejtësi, Integrim dhe Unitet ka një rritje të jashtëzakonshme në këto zgjedhje që sapo lamë pas. PDIU-ja e Shpëtim Idrizit ka dyfishuar numrin e votave të saj, ashtu si dhe premtoi kryetari i saj në fushatën elektorale. Nga 45 mijë vota që ishte para katër vjetësh, ajo ia doli që të mbledhë në kushte krejt armiqësore 85 mijë vota, duke u konfirmuar realisht si parti kombëtariste, ashtu si pëlqen ta quajë kryetari i saj.
Partia e Shpëtim Idrizit ka dyfishuar rezultatin në Durrës, ka një rezultat të madh në Lezhë dhe Shkodër, pa folur për, Elbasanin, Rrogozhinën, Dibrën, por edhe Vlorën, ku virusi pervers i Partisë Demokratike nuk e uli numrin e votave. Apo në Fier, ku beteja u bë dhëmbë për dhëmbë dhe natyrisht aspak ndershëm.
Në këto zgjedhje Partia Socialiste pati rritje me 40 mijë vota, Lëvizja Socialiste për Integrim u rrit 40 mijë vota dhe po këtë nivel rritje ruajti PDIU-ja, e cila nuk kishte as pushtetin, as paratë, por eci përpara vetëm me frymë.
Falë marrëveshjes së pagjumsisë së Luli Bashës, kjo rritje spektakolare dënohet vetëm me katër deputetë, ndërsa nëse do të ishin lejuar koalicionet grupi parlamentar i Shpëtim Idrizit do të ishte të paktën me 8 deri në 10 deputetë.
Sot, Idrizi është i detyruar të hyjë në një proces ligjor për mandatin e tij të Tiranës, ku është bërë batërdia zgjedhore. Qeveria ka blerë vota, shpërndau në terren bandat kriminale, bëri presion mizor ndaj aktorëve të tjerë zgjedhorë dhe më pas ka përdorur në numërimin e votave të mirënjohurin sistem bullgar. Po kështu, komisionerët e Kavajës nuk kanë sqaruar një numër jo të vogël votuesish që votohej me dy fletë për Kuvendin dhe Bashkinë, prandaj janë një mijë e ca vota të pavlefshme atje, një pjesë e mirë e tyre për PDIU-në. Natyrisht, të gjitha këto që përmendëm nuk e vënë në dyshim mandatin e Idrizit në Tiranë, por edhe ai është shumë pak për këtë rritje që ka pësuar partia e tij.
Sërish edhe pas këtyre zgjedhjeve vullneti i një shumice dërrmuese zgjedhësish nuk përfaqësohet si duhet ose aspak në Kuvend, sepse përsëri marrëveshjet dy palëshe u bënë që ta pësojnë të tretët, ani se i dëmtuari i parë është lakuriqi i natës Luli Basha dhe mjeshtrit që i duhet thënë “chapeau!” është pa dyshim kreu i qeverisë Edi Rama.
Për fat të keq, një mandat i PDIU-së në këto kushte ka kushtuar mbi njëzetë e ca mijë vota, por ama Luli Bashës në këtë pikë vape ia kanë ngrirë buzëqeshjen në frizer, ndaj ia vlen ta shohësh në këtë pikë halli.
Shpëtim Idrizi në këto ditë të para pas zgjedhjeve mund ta ndjejë veten humbës, sepse në mandate nuk përktheu dot një rezultat të mrekullueshëm. Por, nëse do të bjerë në depresionin numrave aritmetikë, ka për të zhgënjyer ata 85 mijë shqiptarë që nuk zgjodhën asnjë nga partitë tradicionale, por platformën që u tregoi atyre se kemi Veç një Atdhe.
Këtu nuk bëhet fjalë për ringritje, por për administrimin e një fitoreje të thellë që pabesia e kulisës politike, intrigës së orëve të sabahut po synon ta paraqesë si humbje.
