Eduard Selami: Deklaratat e ndërkombëtarëve na vënë në vështirësi, na kalojnë përgjegjësitë. Reagon Basha: E kemi sqaruar Nuland për këtë qëndrim. Deklarata e Mogherinit është shkruar në Tiranë. Vlahutin është pozicionuar qartë për një krah politik
Grupi parlamentar i Partisë Demokratike ka diskutuar në këto momente për takimin e djeshëm midis kryetarit të kësaj partie Lulzim Basha dhe kryeministrit Edi Rama, për reformën në drejtësi. Dështimi i konsensusit në këtë takim, është parë nga disa deputetë demokratë si një përgjegjësi që po duket se bie më shumë mbi opozitën. Burime të 27.al, thanë se deputeti Eduard Selami ka theksuar në këtë mbledhje se deklaratat e ndërkombëtarëve e vënë në vështirësi Partinë Demokratike, për faktin se e gjithë situata duket se e nxjerr opozitën përgjegjëse për dështimin e konsensusit. Në përgjigje të Selamit, Basha ka theksuar: “Ne i kemi sqaruar ndërkombëtarët që jemi për një draft bazuar në rekomandimet e Venecias që mbron drejtësinë nga kapja politike. E kemi sqaruar Nuland për këtë qëndrim. Deklarata e Mogherinit është shkruar në Tiranë. Vlahutin është pozicionuar qartë për një krah politik”.
Kryetari Basha si dhe dy shoqëruesit e tij, Oerd Bylykbashi dhe Edi Paloka, kanë sqaruar detaje rreth takimit me kryeministrin Rama, kreun socialist të komisionit të reformës Fatmir Xhafaj dhe kreun e grupit parlamentar të LSI-së, Petrit Vasili.
Basha ka sqaruar grupin parlamentar për pikat ku nuk është rënë dakord me palën tjetër. Debati vazhdon.
