18 vjet më parë, Pandeli Majko u takua me liderin e atëhershëm të opozitës, Sali Berishën, në një situatë skajshëm të acaruar mes shumicës politike të drejtuar nga Fatos Nano dhe opozitës së drejtuar nga Berisha
Takimi i sotëm mes liderit të opozitës dhe deputetit Pandeli Majko u prit me interes nga media, ndoshta nisur nga profili politik i deputeti Pandeli Majko. Ndoshta tema e bisedës ka qënë vetëm ajo e konferencës së NATO-s që do të zhvillohet së shpejti në Tiranë, por takimi mund të ketë ndikim në raportet e acaruara skajshëm mes mazhorancës e opozitës.
E ngjashme ka qenë situata dhe 18 vjet më parë. Një takim mjaft i rëndësishëm mes ish-kryeministrit Pandeli Majko dhe liderit të të opozitës Sali Berisha u zhvillua në dhjetor 1998. Disa studentë të dhjetorit 90 dhe të tjerë organizuan këtë takim që ndikoi ndjeshëm në uljen e tensioneve, skajshëm të acaruara në atë kohë. Majko, asokohe kryeministër i vendit shoqërohej në atë takim nga zëvendësi i tij në qeveri Ilir Meta. Të dy kishin qenë studentë dhjetori. Në krahun tjetër ishte Sali Berisha kryetar i PD-së, i shoqëruar nga Genc Pollo në atë kohë nënkryetar i partisë. Takimi u konsiderua i sukseshëm pasi ndikoi në uljen e tensioneve.
Por cilat ishin rrethanat që kishin çuar në atë tryezë në ato pozicione dy palët. Më 12 shtator 1998 para selisë së Partisë Demokratike u vra deputeti i kësaj partie, ish-themeluesi i saj, Azem Hajdari. Kryetari i PD-së, Berisha, akuzoi qeverinë për vrasjen e tij, duke e konsideruar këtë si vrasje politike. Dita kur do përcillej për në banesën e fundit deputeti i vrarë u shndërrua në revoltë të ashpër kundër institucioneve qeveritare. Më 14 shtator protestuesit shkatërruan godinën e Kryeministrisë dhe hynë në godinën e Televizioni Shtetëror. Pas këtyre ngjarjeve Kryeministri Nano u largua nga Shqipëria. Ai qëndroi për arsye sigurie në Maqedoni, derisa forcat e rendit, nën drejtimin e ministrit të Rendit, Perikli Teta, vendosën qetësinë e brishtë.
Lufta politike mes mazhorancës e opozitës u ashpërsua skajshëm dhe Kryeministri Nano e etiketoi “grusht shteti” revoltën e 14 shtatorit. Më pas Nano kërkoi mbledhjen e KPD-së dhe mbështetjen e këtij forumi për të bërë ndryshime në qeveri. Por nuk dukej aq e thjeshtë. KPD-ja nuk ishte kompakte në mbështetje të një tjetër qeverie të drejtuar nga Nano, dhe më 28 shtator 1998, Fatos Nano dha dorëheqjen nga posti i Kryeministrit. Vendimi erdhi si rezultat i debateve të ashpra që u zhvilluan ato ditë në forumet e larta drejtuese të PS-së. Kundërshtarët e Nanos nuk i dhanë me besimin këtij të fundit të drejtojë qeverinë. Në vend të Nanos u emërua Kryeministër sekretari i përgjithshëm, Pandeli Majko. KPD e votoi pa përplasje Majkon kryeministër, ndërsa ky i fundit zgjodhi Ilir Metën, si krahun e tij të djathtë në qeveri. Ilir Meta u emërua zëvendëskryeministër i qeverisë së re socialiste dhe në qeveri u përfshinë në mënyrë thuajse të ekuilibruar figura politike që ishin pjesëtarë të dy grupeve kundërshtare brenda PS-së. Majko e Meta drejtuan qeverinë ngjatë krizës së Kosovës dhe ia dolën të menaxhojnë me sukses këtë krizë. Takimi i Majkos e Metës me Berishën e Pollon kishte si teme kryesore, situatëne pritshme të luftës në Kosovë. Por ai takim ndikoi mjaft pozitivisht në raportet mes mazhorancës dhe opozitës. Takimi i sotëm i Majkos e Bashës u tha se kishte si temë Asamblenë e Përgjithshme të NATO-s që do të zhvillohet në 27 maj në Tiranë. Mbetet për tu parë ditët e javët në vazhdim në se ky takim Majko-Berisha do të ndikojë në uljen e tensioneve mes mazhoprancës dhe opozitës, ashtu sië ndodhi 18 vite më parë.
