Ministri i Brendshëm, Saimir Tahiri reagoi sërish paraditen e sotme ndaj Gjykatës së Tiranës dhe Presidentit të Republikës, në cilësinë e kryetarit të KLD, për zgjedhjen e gjyqtarit që pezulloi kreun e Policisë së Shtetit
Tahiri i ka kërkuar presidentit të kthejë përgjigje se ” Pse u zgjodh gjyqtari Arjan Aliaj jashtë ligjit dhe shortit. Një gjyqtar i shkarkuar për lirimin e vrasësve dhe përdhunuesve.Për cilën arsye duhet zgjedhur një ushtar politik?
Ai gjithashtu ironizoi presidentin duke thënë se “Përsa kohë merret me lodrat e kalamajve të kthejë përgjigje. Ka detyrimin si kryetar i KLD-së të përgjigjet. Nëse gjen kohë për lodrat e kalamajve të gjejë kohë për aferat dhe skandalet në gjykatën e tiranës me të tillë kryetar dhe gjyqtar”.
“Gjykata thotë se Arian Aliaj u zgjodh pasi gjyqtari i radhës kishte probleme shëndetësore. Ky është justifikim si ai i Lulit kur justifikonte mungesën në gjykatë me raporte mjekësore. Gjykata ka dhënë një vendim haptazi të parregullt dhe joligjor. Pyes presidentin, pse u përzgjodh Arian Aliaj, i cili është shkarkuar nga detyra pasi ka lejuar lirimin nga burgu të një personi të dënuar me 14 vjet për dhunë seksuale me të mitur? Për cilën arsye u përzgjodh Aliaj, që ka dhënë dhe 4 vendime të tjera për të dënuar që kanë kryer vepra të rënda penale si vjedhje me armë e me dhunë? Përse u përzgjodh ky gjyqtar?”, tha Tahiri.
. “Reforma në drejtësi është vullnet, kurajo dhe forcë për t’u bërë me qytetarët dhe për t’u thënë gjyqtarëve të korruptuar e që mbrohen politikisht “ndal””, ka vijuar Tahiri.
Ai ka theksuar se segmente të prokurorisë dhe gjykatës janë bërë pjesë e frontit që nuk duan reformën në drejtësi. Ndaj dhe “ky sistem duhet tronditur nga themelet për t’i dhënë liri prokurorëve dhe gjyqtarëve të bëjnë drejtësi sipas ligjit dhe jo sipas politikës” u shpreh ministri.
