Kryeministri Edi Rama është shprehur se ata persona që merren me tabelat rrugore në gjuhën greke, kërkojnë të bëjnë sherre.
Në një deklaratë Rama tha se tabelat rrugore në gjuhën greke që u hoqën pak ditë më parë në jug të Shqipërisë, do të vendosen sërish nga nesër, por në përputhje me ligjet dhe kriteret teknike.
Kryeministri shtoi se “tabelat nuk u hoqën se kishin lidhje me minoritetin, por se ishin jashtë kritereve teknike dhe pa respektuar parametrart e sigurisë, duke shmangur një leje që do i kishte evituar të gjitha këto”.
“Para pak ditësh u ngrit një furtunë për disa tabela të vendosura pranë një zone me shumicë mionoritare, u tha çfarë nuk u tha këtej, u pasua andej, gjithmonë nga zëra që kërkojnë sherr. Tabelat nuk u hoqën se kishin lidhje me minoritetin, por se ishin jashtë kritereve teknike dhe pa respektuar parametrart e sigurisë, duke shmangur një leje që do i kishte evituar të gjitha këto.
Nesër do të vendosen, dhe deri të premten do të jenë të vendosura të gjitha në përputhje me ligjet dhe kriteret në Shqipëri. Dhe për të gjithë ata që bëjnë patriotin, u them se ne jemi një vend europian, dhe kur flasim për Europën flasim edhe për këtë. Kush do të bëjë vota dhe propagandë, le ta bëjë, por kurrë nuk do të arrijë të kthejë mbrapsht rrugën e një tradite që është e shkruar edhe në kanunin tonë”, deklaroi Rama.
