Kreu i Partisë Demokratike, Lulzim Basha në një postim në facebook shkruan se ka qenë 17, vjeç kur i ka dhënë dorën për herë të parë ish-kryeministrit Sali Berisha dhe se ishte angazhuar për përkushtim pa kushte për PD.
Ai thekson se me Berishën nuk ka patur kurrë marrëveshje e as besë mes tyre për të “shkelmuar sakrificën e demokratëve” për të mbrojtur njëri-tjetrin, nëse cënoheshin interesat personale. Për kritikat dhe etiketimet që Berisha i ka bërë atij që kur u përjashtua nga grupi parlamentar i PD, Basha tha se kanë shtangur gjithkënd.
Postimi i plotë:
Të vetmen besë që kam lidhur me Sali Berishën, që ditën e parë që i kemi dhënë dorën njëri-tjetrit kur kam qenë vetëm 17 vjeç, ishte për angazhimin dhe përkushtimin tim pa asnjë kusht për demokracinë, për Partinë Demokratike, për demokratët, për Shqipërinë . E njëjta besë ka qenë edhe në 2005, kur u angazhova me gjithë forcat e mia për fitoren e Partisë Demokratike, e më pas për përmbushjen e projekteve që ndryshuan njëherë e përgjithmonë Shqipërinë, të cilat i rikthyen dinjitetin shqiptarëve. Kurrë nuk ka pasur marrëveshje e as besë mes meje dhe Sali Berishës, që të shkelmonim sakrificën e demokratëve, për të mbrojtur njëri-tjetrin nëse cënoheshin interesat personale. Që pas 9 shtatorit gjithkush është shtangur nga etiketimet që Sali Berisha ka bërë ndaj meje. Natyrisht unë nuk kam ndërmend të shkel mbi vitet e bashkëpunimit me të, në të mirë të shqiptarëve dhe Shqipërisë . Besa ime është për ta dhe për çdo demokrat, siç ka qenë ditën e parë.
