Policia e Kosovës ka njoftuar se ditën e sotme në orët e para të mëngjesit kanë ndodhur dy shpërthime në Sharpej të Jarinjës.
Përmes një komunikate për media, policia ka bërë me dije se shpërthimet kanë ndodhur afër veturës së policisë e cila ishte në një pikë statike ku policia ishte e përqendruar në parandalim të kontrabandës në atë zonë.
Gjithashtu, dyshimet janë hedhur se sulmet vijnë nga territori i Serbisë. Nga këto shpërthime nuk ka të lënduar dhe as dëme materiale.
“Nga shikimi i vendit të ngjarjes është vërejtur se në xhamin e veturës policore ka mbetur një copë letre dyshohet mbështjellës i mjeteve piroteknike. Ngjarja ka ndodhur në një pjesë që është afër territorit të Serbisë dhe dyshimi i bazuar është se këto mjete janë hedhur nga territori i Serbisë. Policia ka qenë duke monitoruar një rrugë ilegale të mbyllur kohë më parë dhe e cila përdorej për kontrabandë të mallrave.”
Së fundmi, nga ky rast nuk ka persona të lënduar. Policia është duke e trajtuar ngjarjen dhe do të vazhdojë aktivitete operative për të parandaluar aktet kriminale trans-kufitare në atë zonë dhe ofrimin e sigurisë për të gjithë.
