Në një konferencë për mediat, Presidenti i Serbisë, Aleksandar Vuçiq, siç edhe kishte premtuar, ka folur rreth çështjes së luftimeve në Ukrainë që i ka filluar Rusia. Vuçiç ka folur edhe për pozicionin e Serbisë në situatën që tashmë ka esklauar në Ukrainë, pasi Rusia filloi invazionin duke mos zgjedhur objektivat për t’i bombarduar.
Në konferencë Vuçiç lexoi konstatimet e Këshillit të Sigurisë Kombëtare, ku në pikën e parë është theksuar se “Serbisë i vjen keq për gjithçka që ndodh në Evropën Lindore”.
“Një prej parimeve të politikës së jashtme të Serbisë është respektimi i shteteve sovrane. Serbia ofron përkrahjen e plotë për integritetin territorial të Ukrainës” – tha ai.
Megjithatë, theksoi se vendi i tij nuk do t’i vë sanksione Rusisë, pavarësisht se shumica e vendeve të botës tashmë e kanë bërë një gjë të tillë.
“Serbia do të udhëhiqet ekskluzivisht nga interesat e saj kur të vendosë për miratimin e masave kufizuese dhe sanksioneve kundër çdo vendi përfshirë Rusinë” – duke e bërë të qartë se Serbia nuk do të vendosë sanksione ndaj Rusisë.
