Një vogëlushe, vetëm katër vjeç ka humbur jetën gjatë një sulmi ajror nga Rusia në Ukrainë. 4-vjeçarja me sindromën Down ndodhej së bashku me dy fëmijë të tjerë të cilët po ashtu mbetën të vrarë kur raketat ruse goditën qendrën e Vinnytsia. Ndërsa nëna e saj, Irina Dmitrieva u plagos rëndë nga sulmi.
.Pak para goditjes së raketave, Irina kishte postuar një video në internet ku shihej Liza duke buzëqeshur në atë ditë me diell. Ajo ishte duke shtyrë karrocën e saj rozë përpara saj, ndërsa po bisedonte me mamanë e saj. “Liza ishte shumë e gëzuar, i pëlqente të vinte tek ne. Ajo ishte një fëmijë shumë i sjellshëm. Për nënën e saj ishte i gjithë kuptimi i jetës së saj. Ajo e donte atë çmendurisht. As që mund ta imagjinoj se çfarë tragjedie është për familjen”, tha drejtoresha e logopedisë, Valeriia Korol për BBC.
Ajo drejton qendrën për fëmijët me aftësi ndryshe ku Liza kishte marrë pjesë në një seancë atë mëngjes, siç bënte shumicën e ditëve. LogoClub ku shkoi Liza është vetëm një bllok nga Sheshi i Fitores, ku goditën raketat dhe stafi i kishte çuar të gjithë fëmijët poshtë në strehë kur u dëgjua sirena e sulmit ajror. Por si shumë njerëz, Liza dhe nëna e saj ishin ende në rrugë.
Kur filloi lufta, ata ishin kthyer në Vinnytsia nga Kievi për siguri, sepse ishte larg vijës së frontit. Në këtë sulm u vranë edhe dy djem 7 dhe 8 vjeçar ndërsa nga klinika nuk ka mbetur gjë tjetër veçse mure të nxira nga zjarri.
BBC raporton se njëzet e tre persona kanë humbur jetën dhe tetë të tjerë janë ende të zhdukur ndërsa dhjetëra të tjerë ndodhen në spital.
