Mjekët prej dekadash rekomandojnë vitaminën D në formë pilule për forcimin e kockave, sidomos te fëmijet, por edhe për rigjenerimin e tyre te më të rriturit e të moshuarit.
Por, një studim i publikuar në “Neë England Journal of Medicine” tregon se efektet e kësaj vitamine në realitet janë zero për forcimin e kockave.
Studimi ka analizuar gjithashtu edhe efektet e hamendësuara pozitive të vitaminës D në parandalimin e problemeve kardiovaskulaore, apo onkologjike dhe edhe në këtë rast përfundimi është se nuk kanë efekt pozitiv.
Autorët e studimit u kanë bërë thirrje autoriteteve shëndetësore dhe mjekëve që të rishikojnë recetat e tyre me vitaminën D. Ndër të parët që ka lëvizur në këtë drejtim është shoqata italiane e farmacistëve, që thotë se do të rishikojë udhëzimet, përfshirë këtu edhe dhënien e vitaminës për të infektuarit me Covid, me idenë se ajo parandalon infeksionet.
Studimi ka përfshirë një grup të madh mjekësh e shkencëtarësh amerikanë. Në të u studiuan efektet e vitaminës D te rreth 26 mijë persona. Autorët thonë se në një pjesë të vogël të tyre, më pak se 150 vetë, efektet jo vetëm që nuk ishin pozitive, por ishin të kundërta.
Ky nuk është studimi i parë që e cilëson si mit efektin pozitiv të vitaminës D të marrë me pilula. Në 2014 një studim i ngjashëm, por me një numër pjesëmarrësish shumë më të vogël doli në të njëjtin përfundim.
E përbashkëta e dy studimeve është se efektet e vitaminës D në organizëm janë të pazëvendësueshme, por vetëm kur ajo merret natyralisht, pra përmes ekspozimit të kujdesshëm në diell.
