Naun Shundi, një nga emrat më të njohur të kinematografisë shqiptare feston sot 59-vjetorin. I diplomuar në regjizurë dhe aktrim, Shundi praktikoi për shumë vite talentin e tij duke u njohur dhe dashur nga publiku shqiptar.
Thuajse në kulmin e karrierës së tij ai zgjodhi të tërhiqej nga vëmendja mediatike. Një një intervistë të dhënë më herët për gazetarin Enkel Demi, në emisionin “Fol me mua, fol me ata”, Shundi ka treguar pse u largua pikërisht në atë moment.
“Eshtë si puna e sportistëve, janë të mencur ata që largohen në kulm të karrierës. Jo pasi hanë dru e shqepen mirë e mirë, thonë ika unë se po rrahem. E dija se do vinte shqepja prandaj vendosa të iki faqebardhë”, ka deklaruar Shundi.
Gjatë intervistës Shundi ka dhënë edhe një “formulë” për të gjithë ata që dëshirojnë të përcjellin mesazhe përmes televizionit. Një këshillë që do të bënin mirë ta mbanin parasysh drejtuesit e spektakleve që kanë shumë pak për t’i ofruar publikut.
“Mund të ndikosh tek tjetri përmes ekranit nëse je i bindur tek ajo që thua. Besimi vjen nga fakti që ti e di ç’thua ose duhet ta dish fare mirë se ç’thua sepse gjëja që t’i pretendon të thuash është gjëja më e mençur në botë, duhet trajtuar si e tillë, ndryshe mos dil në ekran sepse njerëzit të shohin në dritë të syrit”, shprehej Shundi.
