Korçarët mund ta kishin fituar më lehtë takimin ndaj Flamurtarit, pasi e dominuan ndeshjen, ndërsa skuadra e Sormanit ka bërë regres duke e krahasuar me atë të Europës
Eshtë luajtur vetëm java e parë e Kategorisë Superiore, madje jo e gjitha, dhe është e vështirë të shohësh në fushë ndryshimet 10 skuadrave pjesmarrëse. Gjithsesi, pas ndeshjeve të së mërkurës mund të kuptosh që Skënderbeu e ka serioz pretendimin për një titull të shtatë kampion i vendit. Korçarët vërtetë e mundën Flamurtarin me një 11 metërsh që ndoshta nuk duhej vërshëllyer nga arbitri lushnjar Laver Alla, por dominuan totalisht një takim që duhet ta kishin mbyllur shumë më përpara. Salihi është gjithmonë prezent për të goditur, sapo mbrojtjes kundërshtare i humbet pak vëmendja, ndërsa mbështetësit e tij në vijën e parë, Serxhio ose Xhejms janë lojtarë me kualitet. Ndërsa pjesa tjetër e skuadrës është gjithmonë e shëndetëshme, e gatshme për rë rifituar tituj të mëdhenj. Gjithashtu edhe Partizani fitoi me një penallti fantazëm, mund të ndodhë edhe kështu, por ajo që bën përshtypje është se nuk prodhoi fare lojë. Madje më paradoksalia është, se ka luajtur shumë më mirë në përballjet europiane, kur kishte një skuadër emergjence.
Ndërsa Sormani është i dashuruar pas futbollistëve të transferuar nga Sudtirol, një skuadër e Lega Pro, që u bë e njohur në Shqipëri pikërisht falë tij. Tha pas ndeshjes, megjithëse nuk u pyet për këtë, se Ekuban ishte më i miri për të tijët, ndërkohë që ai është sulmues i parë dhe deri tani nuk ka shënuar asnjëherë, madje shumë rrallë e ka gjetur kuadratin e portës. Ramadani ishte një nga lojtarët më të spikatur në ndeshjet e Champions dhe Europa League, por në kampionat nuk është më as alternativë, i zëvendësuar nga Bertoni, një “ish” i Sudtirol, futbollist që deri pak ditë më parë donin ta largonin. Po kështu Fili ka humbur shumë minuta, Ibrahimit po i rrezikohet vendi dhe shihet qartë që është shumë i nervozuar. Pra pas 90 minutave të para, duket se në garën e re për trofe është Agostineli më i avantazhuar se zëvendësuesi i tij.
