Skënderbeu ka fituar ndeshjen e mbrëmjes ndaj Teutës me rezultatin 1-0 dhe ruan diferencën prej katër pikësh me Partizanin. Por kjo duhet të jetë edhe humbja më e hidhur e skuadrës së Maganit në këtë sezon, pasi absolutisht meritonte më shumë për atë çka dha në fushën e lojës. Mjaftoi një gol të në 6’, pas një mungese vëmendje të kapitenit Rustem Hoxha, Xhejms përfiton dhe shmang portjerin Moçka dhe më pas Liridon Latifi nuk e ka të vështirë ta përplasë topin në rrjetë. Edhe diçka më shumë se 10 minuta ishin korçarët që vazhduan të dominonin në fushë, ndërsa më pas loja barazpeshohet, madje ishin durrsakët që filluan të mbulonin më shumë territor. Magani në pankinë e kishte vendosur shumë mirë skuadrën e tij, ndërsa Magani junior në fushë tërheq përpara ekipin dhe sidomos në pjesën e dytë dukej herë-herë sikur Teuta ishte e zonja e shtëpisë. Por në fund fitojnë kampionët, madje meqenëse futbolli është kapriçioz, fitorja e tyre mund të ishte edhe më e pastër. Në një nga rastet e pakta që vizituan portën e miqve, korçarët fituan edhe një 11 metërsh, që më pas nuk u shndërrua në gol nga Hamdi Salihi.
