Ministri i Brendshëm Saimir Tahiri e ka cilësuar, një vendimarrje skandaloze dhe si një qokë politike, masën e sigurisë “arrest shtëpie” për zyrtarët e policisë së shtetit. Artjon Duka dhe Entiol Xhelilaj njëri drejtor i Forcave Operacionale dhe tjetri specialist pranë kësaj force, mbeten sot me masën e sigurisë “arrest shtepie”, të akuzuar si të përfshirë në skandalin e përgjimeve.
Në deklaratën e dhënë për mediat Tahiri është shprehur: – “Në vazhdim të denoncimeve tona të vendimarrjeve skandaloze të gjyqtarit Arjan Aliaj, dal sot para jush pas vendimi të këtij gjyqtari për të lënë në arrest shtëpie dy punonjës shumë të mirë dhe të përkushtuar të policisë së shtetit Artjon Duka dhe Entiol Xhelilaj,të cilët kanë kryer detyrën me përkushtim në forcimin e bashkëpunimit dhe besimit ndërmjet policisë shqiptare dhe partnerëve ndërkombëtarë falë të cilave policia shqiptare në bashkëpunim me partnerët ka korrur një sërë rezultatesh themelore për të ndërtuar marrëdhënien kyç që duhet ndërmjet agjencive ligjzbatuese, luftën kundër kriminalitetit dhe veçanërisht terrorizmit. Gjyqtari Arjan Aliu ka vendosur arrest shtëpie për oficerin Duka me argumenta skandalozë, që nuk janë të denjë as për një student të juridikut jo më për një gjyqtar. Është një përpjekje e dështuar për të bërë qokën politike të rradhës.
Këto argumenta të parashtruara në gjykatë janë prova më e qartë që ka zënë frontin e të keqes në këto institucione për pengesë me sa munden të rrugës tonë për të miratuar reformën në drejtësi. Janë një arsye e fortë më shumë për ne për të ecur përpara në rrugën për miratimin e reformës në drejtësi. Gjyqtarë të tillë nuk janë të denjë sa kohë janë peng i së shkuarës së tyre ku kanë liruar vrasës dhe përdhunues dhe sot nuk janë në gjendje të bëjnë detyrën përveçse të qepin argumenta ordinërë të këtij tipi. Do i shkojmë deri në fund kësaj çështje duke denoncuar jo vetëm atë që ka shërbyer si pretekst për të hapur këtë çështje, por për të shkuar deri në fund cilitdo që është fryrë dhe majmur duke bërë padrejtësi të fshehur në sqetullën e pushtetit politik që i ka mbrojtur sa herë kanë bërë mëkat. Është një betejë që sapo ka filluar dhe këtë betejë do ta fitojnë shqiptarët, e drejta dhe e vërteta”.
