Qeveria Italiane, vendosi sot të tërheqë përfaqësuesin e Interforce nga Shqipëria dhe ky vendim lidhet me skandalin e përgjimeve. Ndërkohë gjykata ka vendosur pezullimin e drejtorit të policisë së shtetit Haki Çako
Kryeministri Edi Rama, i kërkoi sot ndjesë publike qeverisë italiane lidhur me skandalin e përgjimeve. Kryeministri doli në një deklaratë për mediat ku tha se është një ngjarje e pajustifikueshme pezullimi i Drejtorit të Përgjithshëm të Policisë së Shtetit dhe ndalimi i dy drejtuesve të saj. Sipas Kryeministrit shpjegimet e dhëna nga Ambasadori italian në Tiranë duhet të kishin mjaftuar që institucioni shqiptar i akuzës të mos përfshihej në një makinacion kaq të rëndomtë politik. “Çka ka ndodhur sot me pezullimin e Drejtorit të Përgjithshëm të Policisë së Shtetit dhe ndalimin e dy drejtuesve të saj, më imponon t’i kërkoj ndjesë publikisht qeverisë mike dhe partnere të Italisë. Kjo ndodhi është e pajustifikueshme dhe për Shqipërinë është një tjetër kambanë që bie për emergjencën kombëtare të Reformës në Drejtësi.
Mbroj fort pikëpamjen se shpjegimet e dhëna nga Italia përmes Ambasadorit italian, pa asnjë detyrim, por vetëm si shprehje e miqësisë së sinqertë dhe vullnetit më të mirë, për të vendosur nën dritën e fakteve legjendën politike të përgjimeve, duhet të kishin mjaftuar që institucioni shqiptar i akuzës të mos përfshihej në një makinacion kaq të rëndomtë politik. Por fatkeqësisht nuk ka ndodhur kështu dhe sot, miqtë e partnerët tanë të provuar në çdo ditë të vështirë të Shqipërisë së këtyre njëzetë e pesë vjetëve, kanë të drejtë të ndjehen të lënduar nga përfshirja e tyre indirekte në një hetim absurd si edhe, më zi akoma, nga veprimi ekstrem që ka ndërmarrë sot prokuroria”, tha Rama.
Pas pezullimit të drejtorit të Policisë së Shtetit, qeveria italiane vendosiu të tërheqë nga Shqipëria kreun i Interforce. Nuk ka ende një njoftim për zëvëndësimine tij.
