Skandal, Veliaj shkatërron fushën sportive për të ndërtuar pallatin 11 katësh

0
112

Kryebashkiaku Erion Veliaj po iu merr kryeqytetasve një tjetër zonë të gjelbër dhe argëtimit, për të kthyer në pikë betonizimi. Këtë herë radhën për t’u shkatërruar e ka portit pranë Fakultetit të Inxhinierisë, e njohur si kompleksi sportiv Dajti. Ky kompleks është pranë Fakultetit të Inxhinierisë së Ndërtimit dhe aktualisht ka 8920 m2 hapësirë, e cila frekuentohet shumë nga banorët të rinj e të moshuar, por kryebashkiakut nuk i del inati derisa të betonizojë të gjithë Tiranën. Prandaj ka vendosur që edhe kjo hapësirë e mbetur në qytet të mbushte me pallate gjigante.

Në dokumenti e firmosur nga vetë Veliaj, thuhet se   do të ndërtohet fillimisht një pallat 11 katësh. Në total janë 24 mijë e 700 m2 ndërtim. Ndërsa vetëm kati i parë do të jetë 2245 m2. Sipas këtij projekti, pas pak muajsh këtu do të ketë vetëm 2300 m2 sipërfaqe të gjelbërt pasi çdo gjë tjetër do të kthehet në beton, asfalt apo dhe tulla. Kjo tregon shkatërrimin që po i bëhet këtij qyteti çdo ditë nga vetë dora e Veliaj.

Reagon Andi Lila

Bashkia e Tiranës është kritikuar shpesh për zënien e hapësirave në qendër të Tiranës apo shembjen e banesave të vjetra duke ndërtuar kulla, por asnjëherë nuk i ka marrë parasysh ankesat dhe kundërshtimet. Për prishjen e fushës sportive kanë reaguar edhe vetë qytetarët, ndërsa sot ish-kapiten i ekipit të Tiranës dhe skuadrës Kombëtare i ka dërguar një letër zyrtarë Veliajt, ku i kërkon anulimin e këtij vendimi.

I revoltuar ai tregon se është shokuar nga ky lajm dhe shprehet se ky projekt i hap rrugë shkatërrimit të qytetit, për të kënaqur të babëziturit për ndërtim dhe para.  “Jam shokuar nga lajmi i bërë publik se Bashkia Tiranë e më konkretisht z. Erjon Veliaj me një vendim të datës 28.12.2021 ka ndryshuar destinacionin e kompleksit “Dajti” nga zonë sportive e rekreative në zonë banimi. Me këtë vendim Bashkia Tiranë i ka hapur rrugën shkatërrimit të një kompleksi sportiv që i shërben jo vetëm ushtruesve të sportit por edhe Universitetit të sporteve me qëllim për ta vënë këtë kompleks në dispozicion të babëzisë së ndërtimit”, shkruan ai.

Në këtë letër ai ka edhe një thirrje për kryeministrin Edi Rama, ku i kërkon të  shoh abuzimet që bëhen në vend, ndërsa akuzon Bashkinë Tiranë se po kthehet në një Republikë më vete për tjetërsimin e pronës publike.