Një zyrtar i rebelëve sirianë ka njoftuar se është arritur armëpushim mes forcave qeveritare dhe kryengritësve në Aleppodhe pritet të zbatohet në orët e vona të së martës pas bisedimeve mes rebelëve dhe aleatit të Damaskut, Rusisë.
Një tjetër burim i rebelëve tha se marrëveshja tashmë është arritur dhe pritet evakuimi i civilëve dhe luftëtarëve nga pjesa e vogël e qytetit, ku rebelët mbanin ende kontrollin, në një kohë kur forcat e presidentit Bashar al-Assad dhe aleatët e tij gjendeshin shumë pranë kontrollit të plotë të qytetit.
Zyrtari i parë tha se fraksionet e rebelëve kishin rënë dakord me Moskën se sulmet ajrore nga pala qeveritare do të ndaleshin në qytet që prej orëve të para të së martës.
Zëdhënësi i këtij grupi, Yasser al Yousef tha se marrëveshja do t’u lejojë rebelëve të largohen me ngarkesën e armatimeve të lehta, por nuk dha detaje të mëtejshme. Një burim i ushtrisë siriane, gjithsesi, tha se ushtria ende nuk kishte informacion mbi armëpushimin në Aleppo.
