Roger Scruton është një nga mbështetësit më të vendosur të konservatorizmit, duke u shprehur se ‘unë u bëra konservator në kohën e revoltave studentore të vitit 1968 në Francë… Pasi, përballë këtyre lëvizjeve me frymëzim anarkist, eklektik e marksist, mendova se duhet të kishte dhe një rrugë tjetër për të mbrojtur civilizimin perëndimor kundër këtyre goditjeve. Në këtë moment u bëra konservator dhe u binda se ishte më mirë që këto vlera të mbroheshin e konservoheshin se sa të shkatërroheshin’. Premtimet utopike të socializmit mbështeten në një vizion abstrakt të botës dhe shoqërisë, i cili është shumë larg asaj që mendojnë dhe dëshirojnë pjesa dërrmuese e njerëzve të lirë në shoqëritë demokratike. Shoqëria e ruan integritetin e saj nëpërmjet autoritetit të shtetit të së drejtës dhe jo utopive imagjinare, sado joshëse të duken ato. Paragjykimet utopike janë gjithmonë irracionale, ndërsa e drejta për të qenë i lirë përbën thelbin e civilizimit perëndimor, nënvizon Scruton në veprat e tij.
Libri “Si të jesh i djathtë” është një nga librat më elegantë të filozofisë politike, në të cilin Roger Scruton trajton sfidat më të mëdha të mendimit politik konservator, por edhe të veprimit politik të partive që janë të rreshtuara në anën e djathtë të skeptrit politik.
Me një gjuhë të përkorë dhe thellësi të rrallë, Scruton depërton në konceptet themelore të konservatorizmit dhe ndërton qasjen që duhet të ndjekin partitë, organizatat dhe mendimtarët politikë në botën e sotme.
Roger Scruton cilësohet si Edmund Burke i ditëve të sotme. Ndikimi i tij mbi filozofinë dhe sidomos mendimin filozofik konservator është i jashtëzakonshëm. Shumica e ideve të tij artikulohen dhe debatohen gjerësisht në mjediset politike dhe shihen si përgjigja më e mirë që mund t’u japë e djathta, problemeve madhore me të cilat përballet njeriu dhe bota sot.
Skeda:
Titulli: Si të jesh i djathtë
Gjinia: Esse
Autori: Roger Scruton
Përktheu: Brenton Kotorri, Fitim Zekthi
Shtëpia botuese: UET Press
Viti 2016
