Atentati i sotëm në Vlorë, është i ngjashëm me atë të një filmi aksion.
Janë dashur vetëm 120 sekonda ose 2 minuta për të zënë pritë dhe më pas ekzekutuar Geno (Shpat) Lenën dhe Hakim Xhezon. Çdo lëvizje e autorëve është planifikuar me qëllimin final ekzekutimin e dy personave.
Geno (Shpat) Lena dhe Hakim Xhezou kapën të papërgatitur, pasi sot nuk kanë qarkulluar me mjetin e tyre të blinduar por me një mjet tip “Benz” gri. Detaj ky që është vënë re nga autorët e dyshuar me pagesë.
Ngjarja ka ndodhur në aksin Fier-Vlorë në afërsi të fshatit Panaja, mëngjesin e sotëm rreth orës 10:00. Autorët të cilët dyshohet se kanë qenë tre kanë qëlluar me 3 automatikë duke mos u lënë mundësinë shënjestrave të shpëtonin.
Sipas hetimeve dhe burimeve për gijotina.com bëhet me dije se autorët kanë ndjekur çdo lëvizje të viktimave dhe në momentin e ekzekutimit kanë shkuar paralel me mjetin “Benz” të viktimave dhe kanë hapur zjarr, më pas janë larguar nga vendi i ngjarjes.
Plumbat bënë që mjeti ku ishin Xhezo e Lena të humbte kontrollin e të përfundonte në kanal, duke mos u lënë asnjë mundësi shpëtimi.
Makina nga e cila ata qëlluan në drejtim të viktimave u gjet më pas e djegur në fshatin Frakull ndërsa brenda saj ishin edhe 3 automatikë.
Pistat e hetimit/ Hasmëria
Mësohet se Lena është një emër i njohur për drejtësinë pasi ka qenë njëri prej autorëve të dyshuar për vrasjen e biznesmenit Arben Beqiri në vitin 2019 për të cilën u la në burg Eduard Xhezo i cili është vëllai i Hakim Xhezos që u ekzekutua ditën e sotme.
Lena është arrestuar në mars të këtij viti pasi ishte shpallur në kërkim prej vitit 2019. Ndërsa ndaj tij u mor vendimi për detyrim paraqitje sa i takon përfshirjes në vrasjen e biznesmenit Arben Beqirit.
37 vjeçari Lena i cili njihet si një prej “të fortëve” të Vlorës, u përfshi në konfliktin që ndodhi pas rrahjes së Gazment Alushit në nëntor të vitit 2019, sherr që më pas solli edhe vdekjen e Arben Beqirit.
Pista e dytë është ajo e pazareve të drogës
Hakim dhe Eduari Xhezo, i arrestuar për vrasjen e Arben Beqirajt kanë qenë subjekte të Operacionit Forca e Lligjit. OFL më Korrik 2020 u nisi kërkesat me shkrim për vetëdeklarimin e burimeve të pasurisë, dy vëllezërve Eduart dhe Hakim Xhezo. Sipas OFL, ndaj Eduart Xhezo, Gjykata e Rrethit Gjyqësor Vlorë ka vendosur masën e sigurisë “Arrest në burg”, për vrasjen e biznesmenit Arben Beqiraj në Vlorë. Ndërsa Hakim Xhezo, rezulton i dënuar nga Gjykata e Rrethit Gjyqësor Vlorë, për veprën penale “Prodhimi dhe shitja e narkotikëve”. Për këtë arsye nuk përjashtohet edhe kjo pistë hetimi.
