Nga Julian Hoxhaj
Plani i antishqiptarizmit vijon të zbatohet me sukses. Vokacioni i tyre në vendimarrje në trevat etnike rrudhet çdo ditë e më shumë, madje frikshëm bashkëkombasit tanë hodhën votën për partitë sllave. Shqiptarët në Maqedoni kanë votuar jo pak partitë maqedone, duke kryer kështu një akt të paprecedent. Është shumë herët të komentosh këtë ngjarje, por nëse duhet hapur një debat sot në Shqipëri e Kosovë, nëse duhet të ketë një analizë të hollësishme të zgjedhjeve në Maqedoni, është pikërisht vota shqiptare për partitë LSDM apo VMRO-DPMNE.
Unë jam i bindur që shqiptarët që kanë votuar Gruevskin apo kundërshtarin e tij politik, nuk e kanë bërë këtë për simpati ndaj maqedonëve, as për shpresë tek ta, as për Kumanovën, as për investimet në qytete dhe fshatra me popullsi shqiptare, as për më shumë vende pune për shqiptarët, as për më shumë të drejta dhe liri ndaj besimit, gjuhës, shpalosjes identiare apo për më shumë shpresë. Vota e shqiptatëve për partitë maqedone është shuplaka me shije të hidhur, jo vetëm për Ahmetin e Thaçin, por për gjithë politikbërësit shqiptarë në Shkup, Tiranë dhe Prishtinë. Rezultatet tregojnë se shqiptarët do të përfaqësohen me më pak deputetë në parlamentin e ri të Maqedonisë.
Kjo do të thotë automatikisht më pak zë për të drejtat legjitime të gjysmës së popullsisë Republikës së Maqedonisë. Shqiptarët do të jenë më të vegjël, më të pa rëndësishëm, më të pa dëgjuarit, më të dhunuarit, më të pa realizuarit, më të përçarët e etnive përbërëse të Maqedonisë. Dhe s’ka se si të mos jetë i befasuar dhe irpnik Gruevski me shqiptarët, të cilët kanë votuar me zell partitë politike maqedone. Këtu nuk mund të akuzohet popullsia shqiptare që ka votuar maqedonasit, sovrani nuk gjykohet. Tirana zyrtare, Prishtina dhe politikbërësit shqiptarë në Shkup duhet të ulen urgjentisht për të analizuar situatën, për të nxjerrë përgjegjësit dhe për të unifikuar faktorin politik në parlamentin e ri të Maqedonisë.
Kjo shuplakë duhet të marrë një reagim të pjekur nga politikanët shqiptarë. Sot, ekzitenca dhe e ardhmja më e mirë e shqiptarëve të Maqedonisë janë vënë pikëpyetje. Tradhëtia politike e BDI, paaftësia e PDSH së Thaçit dhe papjekuria e BESA-s dhe partive të tjera shqiptare në Maqedoni, e kanë futur interesin e mbi 40% të votuesve në qorrsokak. Padyshim që fajtori kryesor është elita politike shqiptare në Maqedoni, por nga ana tjetër Tirana e Prishtina duhet të ishin dhe duhet të jenë më aktivë dhe influentë tek klasa politike shqiptare në Maqedoni. Zvogëlimi i faktorit shqiptar në vendimarrje në parlamentin e Maqedonisë, Serbisë dhe Malit të Zi, është minim i faktorit shqiptar në Ballkan dhe Europë.
