Pas muajsh të tërë lufte me një sëmundje të rëndë është larguar nga kjo botë gazetari i mirënjohur Fatos Baxhaku.
Ai ishte një nga pionieret e shtypit të pavarur që nga fillimi i viteve 90. Autori i njohur i reportazheve të shkruara dhe televizive, studiues i historisë, një penë e mprehtë kritike e tranzicionit shqiptar.
Baxhaku ka lindur në Tiranë më 9 janar në vitin 1964. Ai studioi në Unversitetin e Tiranës në fakultetin e Histori-Filologjisë ku u diplomua në histori. Që nga 1986 e deri në 1992 punoi në Institutin e Historisë së Akademisë së Shkencave. Nga 1993 e deri në 1998 ishte bashkëthemelues, kryeredaktor dhe gazetar i “Gazetës Shqiptare”. Në periudhen 1998-1999 ishte kryeredaktor i pare i lajmeve në televizionin “Klan”. Në 1999-2000 ishte kryeredaktor i revisës se përjavshme “XXL”. Nga 2001 deri ne 2005 ishte kryeredaktor dhe gazetar në televizionin “Vizion Plus”. Ne 2006-20015 ishte kryeredaktor dhe gazetar në të përditshmen “Shqip”.
Fatos Baxhaku ishte autor ose bashkëautor i serialeve me reportazhe “Tunel” (Vizion Plus), “Rrugëtim” (Top Channel), “Shtëpia e Vjetër” (Digitalb), si dhe i shumë dokumentarëve televizivë.
