Konferenca e kryetarëve do të vendosë të hënën për kohën, kur do të miratohet ligjet që bëjnë efektive reformën në drejtësi të miratuar me 140 votat e Kuvendit
Konferenca e kryetarëve mblidhet në fillim të javës që vjen për të marrë një vendim për shtyrjen e seancës për miratimin e këtyre shtatë ligjeve. Burime zyrtare pranë shumicës konfirmojnë për 27.al shtyrjen e kësaj seance. Shtyrja për në shtator e miratimit të shtatë ligjeve duket se do të shtyjë me dy muaj edhe nisjen e zbatimit të reformës në drejtësi. Kjo për shkak se pa miratimin e këtyre shtatë ligjeve refroma në drejtësi e miratuar dje në Kuvend, nuk mund të zbatohet. Shtatë ligjet janë çelësi për të nisur zbatimin e reformës në drejtësi.
Me miratimin e reformës në drejtësi ishte parashikuar që të nisë menjëherë pushimi i institucioneve aktuale dhe ngritja e institucioneve të reja të sistemit të drejtësisë, paralelisht me të edhe vetingu. Por me ç’duket i gjithë procesi do të nisë të zbatohet në mesin e muajit shtator, kur dhe nis sesioni i ri parlamentar.
Ndërkohë që situata mes dy partive të koalicionit të majtë, PS dhe LSI nuk duket të jetë kaq e mirë. Këto ditë në media janë shfaqur shumë momente që flasin për një situatë të acaruar mes Ramës e Metës. Këtë e dëshmoi edhe qëndrimi i Metës në më shumë se një rast, kur përmendi si kërcënim qeverinë teknike apo edhe dorëheqjen e tij nga posti i kryetarit të Kuvendit.
Një dalje e mundshme e LSI-së nga koalicioni qeveritar e komplikon edhe situatën me miratimin e shtatë ligjeve të reformës në drejtësi. Megjithëse Meta ishte protagonist i rëndësishëm në arritjen e konsensusit, nuk është krejt e pamundur që në situata të reja politike të ketë ndryshim të qëndrimit të tij edhe për votën e LSI-së për shtatë ligjet. Shtatë ligjet e reformës kërkojnë 84 vota dhe ishte parashikuar që të votoheshin të enjten e ardhshme në seancë plenare. Justifikimi, me të cilin shtyhet kjo seancë lidhet me kohën që i duhet PD-së të marrë informacion për shtatë ligjet dhe më pas për të rënë dakord për miratimin e tyre. Kjo për shkak se shtatë ligjet janë hartuar, kur opozita kishte bojkotuar komisionin e reformës në drejtësi. Nga dita e hënë deri të enjte më 28 gusht, janë shumë pak ditë për të përmbyllur këtë proces. Burime pranë mazhorancës e kanë konfirmuar shtyrjen e kësaj senace me marrëveshjen e të gjitha palëve. Urojmë që kjo marrëveshje mes palëve të mos shndërrohet në një problematikë për zbatimin e reformës në drejtësi.
Shtatë ligjet e reformës në drejtësi
-Projektligji për disa shtesa dhe ndryshime “Në ligjin nr.8577, datë 10.02.2000, “Për organizimin dhe funksionimin e Gjykatës Kushtetuese të Republikës së Shqipërisë”.
-Projektligji “Për Statusin e Gjyqtarëve dhe Prokurorëve në Republikën e Shqipërisë” dhe procesi për shqyrtimin e tij nga Kuvendi.
-Projektligji “Për Organizimin e Pushtetit Gjyqësor në Republikën e Shqipërisë”.
-Projektligji “Për Organizimin dhe Funksionimin e Prokurorisë në Republikën e Shqipërisë”.
-Projektligji “Për Rivlerësimin e Gjyqtarëve dhe Prokurorëve në Republikën e Shqipërisë”.
-Projektligji “Për Organizimin dhe Funksionimin e Institucioneve në Luftën Kundër Korrupsionit dhe Krimit të Organizuar”.
-Projektligji “Për Organet e Qeverisjes së Sistemit te Drejtësisë në Republikën e Shqipërisë”.
Për të miratuar këto shtatë ligje do të duhen 84 vota, të cilat me sa duket nuk do të kenë asnjë problem për t’u arritur, pasi reforma në drejtësi mori 140 votat e Kuvendit. Me miratimin e këtyre ligjeve, parlamenti mbyll punimnet e këtij sesioni.
