Nga Ermal Mulosmani
Bilanc lufte në ditët e fundit në Shqipëri.
Të premten, më 25 Qershor, në orët e para të mëngjesit, një makinë luksoze me shpejtësi skëterrë, në rrugën Fier Vlorë, godet nga mbrapa makinën me të cilën po udhëtonte një familje e re nga Patosi. E gjithë familja 4 anëtarëshe, dy prindërit bashkë me dy vajzat e mitura Anastasia dhe Eva, u masakruan brenda çarçafit të hekurishteve së Toyotas modeste.
Automjeti i familjarëve po ecte në korsinë e djathtë të rrugës, me shpejtësinë e lejuar të autostradës, me garancitë maksimale që mund të ketë një udhëtar i kujdesshëm…
Në mesnatën e së nesërmes së këtij aksidenti horror, në Velipojë, në hotelin e vëllezërve Gocaj mbërrijnë komshinjtë e Hotel Fantazia. Një atmosferë e tendosur ndjehej prej ditësh mes palëve. Agjensia Kombëtare e Bregdetit (AKB) , autoriteti shtetëror për menaxhimin e zonës bregdetare, kishte bërë një ndryshim në ndarjen e zonës ku do vendoseshin shezlongjet (karriget e gjata) e turistëve. Një pjesë të zonës së vjetshme të Hotelit të Gocajve ua kishte kaluar komshinjve të Ferracakëve.
Tetë të vdekur, katër prej të cilëve nën moshën 25 vjeç…Pesë prej tyre krejt të pafajshëm e në zbatim të të gjitha ligjeve dhe rregullave që funksionon shteti. Turistë të tmerruar morën rrugët natën për të mos u kthyer më në këtë xhungël, të tjerë ndryshuan planet e pregatitura me kohë.
A jetojmë vallë në xhungël apo në një shtet demokratik e funksional?! Kush na mbron nga vetëgjyqësia e nxitur prej papërgjegjshmërisë shtetërore?
Në të gjitha konceptet moderne të shtetit, qysh nga Maks Veberi e deri në ditët tona, shteti përkufizohet si etniteti që ka monopolin e të drejtës së dhunës. Çdo subjekt tjetër e ka të paligjshme ushtrimin e dhunës.
Shteti është garancia që edhe individët më të pafuqishëm, të ndihen të barabartë në shoqëri me më të fortët. Nëse të fortët vrasin 5 të pafajshëm në dy ditë, atëherë misioni i shtetit është i dështuar. Ku duhet të kërkojnë ndihmë njerëzit nëse shteti nuk ua siguron dot jetën? Ky është thelbi i reagimit masiv. Instikti i frikës së nesërme, i rrezikut te dera…
Por si reagoi shteti….
Pak orë pas konfliktit, Zëvendëskryeministri i Shqipërisë, Erion Braçe, lëshon një batare me sharje e mallkime në Fb dhe kërcënoi se… do ta bëjë gjithë vijën bregdetare – shtetërore!
Ky ishte zëri i shtetit që duhej të mbronte jetën e qytetarëve që qeveris!
Imagjinoni pak, sapo kanë vdekur 4 persona, mes të cilëve edhe një 20 vjeçar i pafajshëm dhe ky kloun zotohet se do të shtetëzojë gjithçka që nga tokat, pyjet, lumenjtë, kullotat, fabrikat, hidrocentralet, ndërmarrjet bujqësore, serat etj etj.
Nënteksti: “Ky popull nuk di të menaxhojë asgjë, di vetëm të vritet me njëri tjetrin. Pra, fajin e kanë të vdekurit.”
Këto skërmitje e sikterisje nuk po i lëshon opozita, as viktimat e pafajshme të mungesës së shtetit, por… as më pak e as më shumë sesa Zëvendëskryeministri i Shqipërisë. Kjo klithmë budallallëku, cinizmi e makabriteti bashkë kalohet me një buzëqeshje ironike të lexuesve. Tashmë e kemi pranuar fatalitetin e budallallëkut. I jemi nënshtruar, nënqeshim kithët dhe shpresojmë që e nesërmja të mos jetë dita jonë e pafat. Po nënqeshim me Vdekjen tonë që na përplaset turinjve me trajtën e shtetit të papërgjegjshëm. Ja reagimi i tij:
Është shumë interesant edhe reagimi i disa prej njerëzve publikë në rastin e Shkodrës. Po përmend dy prej tyre.
I pari Kreshnik Spahiu, në një status të gjatë, ankohej pse bëhet e madhe kjo puna e vrasjes së Velipojës. Sipas tij, edhe në mes të Berlinit u bë një përleshje me armë nga mafia arabe, por, asnjë media nuk e bëri të madhe, asnjë portal nuk pati lajm për këtë ngjarje. Pra, Niku, që 4 vjet më parë mallëngjehej, kur thoshte: “Nëse unë bëhem me Sali Berishën pushteti i Edi Ramës nuk zgjat 24 orë”, sot e sheh problemin te media që e publikoi lajmin! Le të vdesin 4 persona, të plagosen 3 të tjerë, le të terrorizohet një popullsi mijëra banorëshe….
“Media le të ndjekë shembullin e Berlinit”- thotë Niku…
Ja ku e keni:
Por prit se nuk ka mbaruar. Më poshtë Spahiu bën një arsyetim ku e nxjerr problemin te populli. “Ne shqiptarët jemi kriminelë të lindur, shiko se ç’bëjmë nëpër botë”. Pra, fabula është e qartë, fajin e kanë të vdekurit. Qeveria jo vetëm që nuki ka faje por i ka rënë në derë një fat kaq i keq të qeverisë një popull kriminel. Dhe kur fajin e ka populli nuk ka recetë që e zgjidh. Si thoshte Kadri Roshi te filmi i famshëm: “Po edhe policia ç’faj ka more zoti kuestor”…
I dyti është gazetari Dritan Hila. Absolutisht i njëjëti qëndrim, fajin e kanë të vdekurit! Hila shkon shumë larg, në vitin 1911 dhe perifrazon një diplomate perëndimore që i etiketon shqiptarët si paranjerëz. Ja statusi i tij:
Dritani është edhe keqinformues në statusin e tij. Ai e çon fajin, si padashje te kryetarja e Bashkisë së Shkodrës, anipse ajo nuk ka lidhje me këtë punë. Por ç’rëndësi ka kjo. Deri sa të merret vesh njerëzit do të shajnë Voltanën… Kryeministri pat dhënë fjalën dy vjet të shkuara se i erdhi fundi rrumpallës së bregdetit se Bashkitë nuk do kenë punë më…
Por, Dritanit i vjen për mbarë ta neglizhojë këtë fakt. Faji duhet çuar te Voltana dhe te Saliu.
Po mirë mo, po Qeveria ka ndonjë faj? Ë Dritan? Para tre javëve Kryeministri i këtyre “paranjerëzve” urdhëroi prishjen e ndërtimeve pa leje në gjithë Shqipërinë. Aksioni vazhdoi me sukses, “paranjerëzit” u bindën. Ata treguan se e respektojnë pushtetin e dhunës shtetërore.
Si e shpejgon Dritani këtë bindje ndaj autoritetit të Shtetit?! Pse shteti, kur do, ka fuqi të jashtëzakonshme ndaj individëve?
Hienat e propagandës duhet të heshtin, shteti të marrë përgjegjësitë. Ai është i vetmi fajtor në 8 vdekjet e këtyre ditëve. Shteti jo vetëm që nuk e parandaloi krimin e Velipojës, por e nxiti atë përmes indiferencës së tij kur konflikti filloi.
/Gazeta Express/
