Ministria e Zhvillimit Urban dhe ALUIZNI Eglantina Gjermeni tha se pallatet me probleme, aty ku pronarët e firmave të ndërtimit i kanë braktisur godinat duke mos iu përgjigjur detyrimit ndaj qytetarëve, ku edhe një kat pa leje ka penalizuar dhjetra familje në marrjen e lejes së shfrytëzimit të apartamenteve do të zgjidhet.
Disa javë pas miratimit të vendimit të Këshillit të Ministrave për legalizimin e shtesave në kate në pallate, Ministrja e Zhvillimit Urban, Eglantina Gjermeni dhe Drejtori i Përgjithshëm i ALUIZNI, Artan Lame zhvilluan një takim konsultues me banorë të njësisë numër 7 në Tiranë.
Gjermeni bëri me dije se, pavarësisht problematikës së hasur, kryesisht në mbledhjen e informacionit të plotë për numrin e pallateve që duhet të legalizohen, të gjitha familjet që preken nga VKM do të kenë në duart e tyre lejen e legalizimit për banesat e tyre.
Pas shqetësimit të disa prej banorëve për individë, të cilët gjatë këtyre javëve janë paraqitur pranë pallateve për të mundësuar legalizimin në këmbim të pagesës, drejtori i ALUIZNI, Lame i bëri thirrje qytetarëve të mos pranonin “shërbime sekserësh”, pasi sipas tij, procesi do të kryhet FALAS dhe vetëm nga punonjës të ALUIZNI.
