Rasti i 44-vjeçarit shqiptar, i cili u gjet i pajetë me një plagë plumbi në kokë brenda një stalle në rajonin e Messinia-s, në Greqi, ka marrë një drejtim të ri në hetime.
Nga të dhënat më të fundit, burime nga hetimi bëjnë me dije se ekspertiza mjeko-ligjore ka evidentuar prova që sugjerojnë se ngjarja mund të ketë qenë vetëvrasje dhe jo një akt kriminal, siç u dyshua fillimisht.
“Trupi i 44-vjeçarit me origjinë shqiptare që u gjet në një stallë në Plazhin Perëndimor të Kalamatës nuk lidhet me ndonjë akt kriminal.
44-vjeçari dyshohet se qëlloi veten me pushkën e gjuetisë që i përkiste pronarit të moshuar të stallës”, tha policia e cituar nga Zougla.
Hetimet janë mbështetur në analizën e gjurmëve të gjetura në vendngjarje, përfshirë provat balistike, shenjat e qitjes, si dhe mbetjet e barutit. Sipas informacioneve paraprake, rezultatet e ekzaminimit tregojnë se 44-vjeçari ka shumë gjasa ta ketë drejtuar armën drejt vetes.
Kjo pistë përforcohet edhe nga dëshmia e një personi të afërt me viktimën, i cili ka deklaruar para policisë se 44-vjeçari kishte shprehur herë pas here mendime për t’i dhënë fund jetës. Po ky person ka qenë edhe ai që ka gjetur trupin e pajetë në stallë.
Sipas hetuesve, viktima është qëlluar me një pushkë gjahu, e cila u gjet më pas e fshehur dhe e zbrazur në një distancë të shkurtër nga trupi. Vajza e pronarit të stallës ka deklaruar se arma i përkiste babait të saj të moshuar, i cili vuan nga probleme serioze shëndetësore.
Ajo ka shtuar gjithashtu se, në momentin kur ajo dhe partneri i saj gjetën viktimën, u frikësuan dhe vendosën ta fshehin armën nga frika se mund të implikoheshin, por më pas kanë njoftuar autoritetet.
Sipas informacionit të policisë, burri u gjet i vdekur, i qëlluar me armë në gojë. Këto prova ishin ato që e zhvendosën hetimin nga një akt kriminal në një skenar vetëvrasjeje.
Raporti mjeko-ligjor hodhi dritë mbi hetimet, duke u përqendruar te vetëvrasja, ndërsa në të njëjtën kohë, vendimtare ishte edhe dëshmia e vëllait të burrit shqiptar, sipas të cilit 44-vjeçari shkoi dje në Kalamata, pasi i kishte rrëfyer atij se po mendonte t’i jepte fund jetës.
Vlen të përmendet se pushka e gjuetisë nuk u gjet në vendin ku u gjet i vdekur 44-vjeçari, por afërsisht 200 metra larg.
gijotina.com/
